Kukhangelelwe ukuba umthethwandaba uzakwethula isinqumo kuliviki sodaba lokuzama ukuvimba abaxotshiswa edale lephalamende lakumakhansili nguMnu. Sengezo Tshabangu ukuthi bengancintisi kukhetho lwama by-elections oluzaqhutshwa ngempelaviki.
UMnu. Khaliphani Pugeni, isikhulumeli sika Tshabangu, uthi udaba lolu luqakatheke kakhulu ngoba kulakho ukuba abanye bevinjwe ngumthethwandaba.
UTshabangu othi ungunobhala jikelele waxotshisa amalunga edale lephalamende akubandla leCCC ambalwa kanye lamakhansila esithi bangena ngundlu ezikhundleni zabo.
Sixoxe njalo ngodaba lolu loMnu. Gift Ostallos Siziva, umsekeli wesikhulumeli sebandla leCCC.
UTshabangu uthi waxotshisa abantu abangena ngudlu kukhetho olwaqhutshwa mhlaka 23 Ncwabakazi lonyaka.
Uthi labo abakhethwa ngamalunga eCCC bakha phansi ngenxa yokuthi uMnu. Nelson Chamisa wayefuna abantu bakhe ukuba bangene ezikhundleni lezi.
UChamisa uyakuphika lokhu esithi uTshabangu usetshenziswa libandla leZanu PF elifuna ukuguqula isisekelo sombuso ukuze uMongameli Emmerson Mnangagwa ahlale esikhundleni okwesikhathi eside.
Forum