Inhlanganiso yeMisa-Zimbabwe ngoLwesithathu isole uhulumende ngokunikeza amankampani akhanya elobudlelwano leZanu PF amalayisensi okusakaza.
Ugatsha lweBroadcasting Authority of Zimbabwe (BAZ) luphe amankampani amahlanu amalayisensi ayisitshiyagalombili okusungula imisakazo yamaradio ezabelweni ezitshiyeneyo.
Amankampani la agoqela iAB Communications, engeyesiphathamandla seZanu PF uMnu Super Mandiwanzira lakahulumende amabili iZimpapers leKingstones.
Amanye ngathi iFairtalk Communications ethole ilayisensi yeSkyz Metro FM koBulawayo leBreeze FM eVictoria Falls. Inkampani le ikhokhelwa nguMnu Cont Mhlanga.
Inkampani yesihlanu yiRay of Hope yona ezasungula iYAFM eZvishavane.
IAB Communications yiyo umnikazi weZiFM njalo imisakazo yayo emitsha igoqela iGogogoi FM eMasvingo leFayaFM eGweru.
IZimpapers iphiwe ilayisensi yeDiamond FM eMutare kuti iKingstone ithole eyokusungula umsakazo weNyaminyami FM eKariba leKE100.4 FM eHarare.
Isiphathamandla salinhlanganiso uMnu Nhlanhla Ngwenya uthi amanengi amankampani la, alobudlelwano leZanu PF.
Sixhume uMnu Ezra Tshisa Sibanda, olenkampani eyancitshwa ilayisensi iSkyz FM.
USibanda laye usole kakhulu uhulumende esithi kasiboni isizatho esiqinileyo sokuncitshwa kwabo ilayisensi.