Lokhu bevalelwe abaphikisayo labalwela ilungelo loluntu loba sekugqitshwe umhlangano we-SADC Summit.
Inhlanganiso yemagqwetha eyeZimbabwe Lawyers for Human Rights ithi izama ngamandla wonke ukuthi kukhululwe umkhokheli weCitizens Coalition for Change, uMnu. Jameson Timba, labanye bakhe abafika phose amatshumi ayisitshiyangalombili labalwela ilungelo loluntu abahlanu ababotshwa besiya emhlanganweni eVictoria Falls labanye.
Inhlanganiso le ithi olensukwana ebotshiwe uMnu. Prince Dubeko Sibanda owayekubandla leCCC, ulokhu evalelwe entilongweni njalo isicelo sakhe sokubhadala isibambiso sebail saliwe namuhla ngumantshi eHarare.
Ababotshwa besetheswa amacala okutshotshozela udlakela lokunye ngesikhathi kulungiselelwa umhlangano weSADC Summit sebefika ikhulu lamatshumi ayisikhombisa – 170.
Abanye abakubandla leZanu PF bathi sokumele abantu laba bekhululwe ngoba uqhutshwe kahle umhlangano weSADC Summit. Kambe eleZimbabwe lizabakhulula na abantu laba njalo uMongameli Emmerson Mnangagwa uzaphatha njani ababotshiweyo lozulu eZimbabwe kulandela ukuqhutshwa komhlangano lo?
Ukuze sizwe okunengi ngodaba lolu, sixoxe loMnu. Nhlanhla Moses Ncube unobhala jikelele weFreedom Alliance othi akulalutho oluzaguquka kulandela ukuqhutshwa komhlangano weSADC Summit eHarare.
Kodwa uMnu. Kudakwashe Munsaka okubandla leZanu PF uthi ilizwe lisezandleni ezinhle.
Forum