Uzulu koBulawayo usehlalele evalweni esesabela ukuqhamuka kwemikhuhlane ngemva ngokubona inani labantu asebebanjwa ngumkhuhlane wesihudo liqansa. Isimo lesi siya sisiba sibi ngamandla ngenxa yokusilela kwamanzi kuleli dolobho.
Umanisipala wakoBulawayo wethule umbiko oveza ukuba kulabantu abaphose bafike amakhulu amahlanu -488, ababanjwe yisihudo ngoNtulikazi. Lelinani lehle laya kwabangaphezu kwamakhulu amathathu-338 ngoNcwabakazi kodwa laphinda laqansa laya kumakhulu phose amahlanu-472 ngoMpandula.
Umngcinisihlalo wenhlanganiso yezakhamizi eye Bulawayo Progressive residents Association I (BPRA), umnunzana Thembelani Dube, uthi ikhansili kumele inanzelele ukuthi impilakahle kazulu isengozini.
“Umkhuhlane wesihudo uyamemetheka edolobheni LakoBulawayo emalokitshini amanengi abantu bakhuluma ngokugijinyiswa yizisu kubangelwa yikuthi abantu amanzi asebewathola amanengi akhona acina engasahlanzekanga ngenxa yokuthi impompi ziyahlala isikhathi eside zingatholi amanzi nxa amanzi esebuya irusi leyana esempimpini asefika ebantwini. Thina njengenhlanganiso sihlale phansi sakucubungula sasibona kufanele sazise umanisipala ukuthi ananzelele ukuthi isihudo sesingaba ngumkhuhlane omkhulu edolobheni ngokunjalo abahlalahlale bavule amanzi ngemva kwamalanga amabili loba amathathu kulalokhu okwenzakalayo. Bavule amanzi kusase lesikhathi ngoba siyakwazi ukuthi kwezinye indawo abantu basuke bayekukha amanzi ezihotsheni lokho kubangela ukuthi abantu babele diarrhea.”
Unkosikazi Melisa Ndlovu oyisakhamuzi sakoBulawayo uthi kubuhlungu ukugijinyiswa yisisu kungela manzi.
“Siyakwazi ukuthi izulu alinanga kuhle iminyaka edluleyo kodwa akube lendlela yokuthi lathi singathwali nzima ngoba khathesi siyananzelela sesihlala isikhathi eside singela manzi njalo esiwaphiwayo mancinyane aweneli ngoba asiphiwa malanga onke ngakho lokhu akusoze kwekele ukuqhamuka eminye imikhuhlane sizaphela sonke nxa ikhansili ingananzeleli asivulelwe amanzi ngesikhathi nxa siphiwa, siphiwe anelayo amalanga abazahlala bengabuyi ngawo kumbe sigejelwe imigodi eminengi.”
Umnunzana Mkhokheli Ndlovu omunye wezakhamizi zakoBulawayo, uthi kukhona okumele ikhansili ikwenze kusasemasinyane.
“lkhansili kumele izame iplan ngendaba yamanzi leyi ngoba isihudo sesithwalise nzima abantu, njengesakhamuzi sesithwele nzima kumele bezame lezibhedlela akulamithi. Ikhansili kumele izame iplan ukuthi inike abantu amanzi a lean ukwenzela ukuthi bengabi lediarrhoea.”
Unkosikazi Sibongumusa Maphosa ongumongikazi ucachisa kabanzi ngomkhuhlane wesihudo.
“Isihudo sibonakala ngokuya ngaphandle kanengi nengi, ukuya ngaphandle kanengi ukhipha idoti engamanzi kuyabe sekuyisihudo Omunye uyabe esizwa isisu sibopha sisiba buhlungu. Ungahuda kanengi kube ngani sekukukhulela I Temperature iyakhwela uyabe usizwa udinwa ungasela mandla. Lokhu kwenziwa kakhulu yidoti njengoba kungela manzi isihudo sizakwanda okuqakathekileyo yikubona ukuthi siyangezelela ukuhlanzeka kwethu.”
Imizamo yokukhulimisana lokhangele ngokuqhutshwa kwenhlelo zezempilakahle, koBulawayo, uDokotela Edwin Sibanda, yehlule ngoba ubengadobhi ucingo lwakhe njalo engaphenduli imibuzo kaStudio 7 ethunyelwe enkundleni yokuxhumana eyeWhatsapp. Kodwa utshele iphephandaba leChronicle ukuthi ukuswelakala kwamanzi sokusenza kube nzima ukuthi kuhlolwe imbangela yesihudo ngoba indawo ezinengi lapho abathatha khona amanzi ukuthi bawahlole kuyabe komile kungela manzi.
USibanda uveze njalo ukuthi ikhansili seyathatha amasampuli angaphezu kwekhulu lamatshumi amabili (122) ukuthi bayehlolisiaa okungabe kubangela isihudo lesi.
Idolobho lakoBulawayo liphakathi kobunzima bokuswela amanzi okokuthi amalokitshi amanengi ethola amanzi kanye ngeviki kuthi amanye aselezinyanga phose eziyisithupha engatholi ngitsho ithonsi lamanzi empompini.
