Osanda kuphuma kubutho leZimbabwe, uRetired General Constantino Guveya Chiwenga, owancedisa uMnu. Emmerson Mnangagwa ukuthi ahluthune intambo zombuso ezaziphethwe nguMnu. Robert Mugabe, usengumsekeli kaMnangagwa kanye loMnu. Kembo Mohadi, owakhulela kubandla leZapu lisakhokhelwa ngumuyi uJoshua Mqabuko Nyongolo Nkomo.
Ngubani uReired General Chiwenga?
UGeneral Chiwenga wazalwa nyomyaka ka 1956 esigabeni seWedza esabelweni
seMashonaland East. Wafunda eSt. Mary’s Mission ndawonye lowayengumkhokheli weAir Force of Zimbabwe uAir Marshal Perrance Shiri, oselesisikhundla somphathintambo kahulumende wezokulima.
Ngomnyaka ka2011, uChiwenga, owayekhangelelwa phansi ngabanye, wathola isicoco semfundo ese Master’s Degree yezobudlelwane lamanye amazwe ekolitshini leUniversity of Zimbabwe.
Kwathi-ke ngomnyaka 2015, wathola esinye njalo isicoco semfundo ephakeme eseDoctor of Philosophy Degree in Ethics ekolitshini yaKwazulu eye University of Natal kwele South Africa.
Ngomnyaka ka2010, abanye abezebutho abahlanganisela uBrigadier General Herbert Chingono loMajor General Fedelis Satuku batshela owayengummeli wesigodlo seMelika eHarare ukuthi uChiwenga wayengafanelanga ukuthi abesesikhundleni somkhokheli webutho.
Bathi uChiwenga wayevele efuna ukungena kwezombusazwe hatshi ezebutho ngoba wayelomgqondo ofipheleyo ngezebutho.
Lokhu konke kwavezwa encwadini ezethulwa ebulenjini beInternet yinhlanganiso ye Wikileaks eyaveza ukuthi ababili laba babemsola kakhulu uChiwenga besithi engadana nxa engasoze athole isikhundla sikamongameli welizwe engaphuma kubutho lesizwe.
UChiwenga wangena empini yenkululeko yeZimbabwe ngomnyaka ka1973. Wafundela ezokulwa eMozambique ekuvuyo leZimbabwe African National Liberation Army – kumbe iZANLA – engaphansi kwebandla le Zanu elalikhokhelwa nguNdabaningi Sithole engakasuswa esikhundleni nguMnu. Robert Mugabe.
Wayesaziwa empini ngegama elithi Dominic Chinenga. Wathola izicoco ezinengi esempini lapho ayekhokhela khona ibutho leli esigabeni seMasvingo leGaza.
Ngomnyaka ka1978 wakhethwa ukuba ngumsekeli kamuyi uJosiah Tungamirai owayephethe isikhundla sokukhuthaza uzulu ukuthi angene empini njalo owayevula abantu ingqondo ngempi yenkululeko esika political commissar.
Ilziwe lathi lithola uzibuse, uChiwenga wakhokhela ivuyo le 1st Brigade koBulawayo sakhutshulwa isikhundla sakhe waba nguMajor General.
Kwathi kubunjwa ibutho leZimbabwe Defence Forces ngomnyaka ka1994, uChiwenga wabekwa ukuba nguLieutenant General, zukuzuku waba ngumkhokheli weZimbabwe National Army. Ngemva kokutshiya umsebenzi okwenziwa ngumuyi uGeneral Vitalis Zvinashe, uChiwenga waphiwa isikhundla sokubangomkhulu weZimbabwe Defence Forces ngomnyaka ka2004.
Wabangumgcinisihlalo wenhlanganiso yabakhangelane lezomvikela eye Joint Operations Command egoqela iZimbabwe Republic Police, Prison Services leCentral Intelligence Organization.
UGeneral Chiwenga, njengomunye wabaseduze lowayengumongameli uMnu. Mugabe, ungomunye owafakelwa izijeziso zenotho lilizwe leMelika kulandela ukungaqhutshwa kahle kokhetho eZimbabwe njalo lokukhahlanyezwa kukazulu ngesikhathi sokhetho.
Izijeziso azifakelwa yinhlanganiso ye European Union sezesulwa.
UMongameli Mugabe waveza sobala ukuthi ibutho ngaphansi kuka Chiwenga kuze kuba lamhlanje lijayele ukuncedisa ibandla leZanu PF kukhetho lwesizwe.
Wathi uChiwenga wanceda kakhulu ukuthi ibandla leli linqobe ngomnyaka ka2008 langomnyaka ka 2013.
UChiwenga waveza ukuzonda uMnu. Morgan Tsvangirai webandla le MDC-T ngokumthuka esithi ungumuntu ophambeneyo ongeke amhlonipha engangena esihlalweni sikamongameli welizwe. Kungakho-ke loba kukhanya engani uTsvangirai wanqoba kukhetho lukamongameli ngomnyaka ka2008, kubikwa ukuthi uChiwenga wancedisa ibandla leZanu PF ukuthi livimbe endaweni ezingengi sokuphindwa ukhetho lukamongameli. UTsvangirai waye bhuqe uMugabe kukhetho olwalusanda kwenziwa.
Umcebisi kamongameli uChris Mutsvanga, ongamgcinisihlalo we Zimbabwe Liberation War Veterans’ Association, uthi uChiwenga loTsvangirai sebakhumisana umlotha, ngemva koku ngenelela kwabalwa impi yenkululeko.
UChiwenga ubikwa ubelokungazwani lowaye ngumphathintambo wezemfundo ephezulu uProfessor Jonathan Moyo, owayefuna ukuthi uNkosikazi Grace Mugabe athathe isikhundla sikaMugabe.
UChiwenga waqoqa ibutho lesizwe wabamba zonke inhlangothi zikahulumende wabika ukuthi uMugabe usebotshiwe njalo badinga abantu abanjengo Professor Moyo okwakuthiwa bagangile njalo bangamasela. UMoyo owayekucele le Generation 40 kubandla le Zanu PF wabaleka eZimbabwe labanye bakhe esesabe ukubulawa nguChiwenga lebutho leZimbabwe.
Kambe ulenotho enganani uChiwenga? Kunzima ukuthola inani yalokho alakho lobakusaziwa ukuthi ulamapulazi amanengi lezindlu ezimbalwa. Wathi esalana lowayengumkakhe, uNkosikazi Jocelyn Chiwenga, kwavezwa emthethwandaba ukuthi ababili laba balenotho enengi okumangalisayo egoqela izimota ezidulayo lamankampani atshiyeneyo.
Umthethwandaba wakuveza njalo ukuthi ababili laba balamapulazi ambalwa, izindlu ezinengi, ubuhlalu obudulayo njalo obubukekayo leyinye impahla elohlonzi.
