Abantu abafika phose amakhulu amabili – 174 sebetholakale belomkhuhlane wecoronavirus COVID-19 eZimbabwe.
Phakathi kwenani leli, sokulabafika phose amatshumi amathathu - 29 asebesilile.Kulabane ababulawa ngumkhuhlane lo eZimbabwe.
Umkhuhlane lo, omemetheka emhlabeni wonke jikelele, usugulwe ngabedlula izigidi eziyisithupha – 6,095,260.
Isibhedlela seJohns Hopkins University sithi kunani leli sebefika phose inkulungwane ezingamakhulu amathathu lasikhombisa – 369,789 ababulawa ngumkhuhlane weCOVID-19.
Kwele Melika, osokubhubhe abantu abedlula inkulungwane ezilikhulu – 103,000, kulabantu abedlula isigidi lengxenye – 1,771,000 asebebanjwe ngumkhuhlane wecovid-19.
Kunengi okwenzakala eZimbabwe obekumele uMongameli Emmerson Mnangagwa abikele uzulu ngesimo sohlelo lolu oluqhutshwa kungelasuku lokuthi luzamiswa nini.
Sokwedlule amaviki amabili uMnangagwa wabika ukuthi luzahlolisiswa ngokuya kwesikhathi.
Luqhubekela phambili uhlelo lokuvalela abantu ezindlini olwe-Lockdown kulabanye abakhala ngezifundo zabantwana.
Kulabanye njalo abathi akubonakali okwenziwa nguhulumende. Bakhona abathi luqhutshwa ngemfanelo uhlelo lolu okumele lungamiswa nguhulumende owathi ozaluhlolisisa kungedlula amaviki amabili.
Omunye oncoma uhlelo lolu nguMnu. Believe Gaule, owebandla leZanu PF, othi abantu besaba abavela kwamanye amazwe.
UGaule uthi lezikolo akumelanga zivulwe ngesiphangiphangi.
UMnu. Mbuso Fuzwayo, okunhlanganiso elwala ilungelo likazulu eyeIbhetshu Likazulu, uthi akucaci okwenziwa nguhulumende okwamanje. Uthi kungaba lokugedla kwamazinyo izikolo zingavulwa.
Lokhu kusekelwa ngumbalisi, uNkosikazi Nomathemba Ncube othi ababalisi kabazi lutho ngokuhlola abantwana.
Umqondisi wenhlanganiso yeZimbabwe Teachers Association, uMnu. Sifiso Ndlovu, uthi kunengi okumele kulungiswe kungakavulwa izikolo.
Umabhalani wohlangothi lukahulumende olwezemfundo, uNkosikazi Tumisang Thabela, uthi akukabekwa usuku lokuvulwa kwezikolo.
Uthi umphathintambo wezemfundo uzakwethula umbiko wokuvulwa lwezikolo hatshi lokhu okuthunyezwa ngabantu ebulenjini bokuxhumana.
