Uzulu ukhuthazwa ukuba atshayele ngonanzelelo emigwaqweni ukuze kwenqatshelwe ukulahlekelwa ngumpefumulo kwabantu engozini zomgwaqo. Lokhu kuza ngesikhathi kulembiko ethi sebefika phose amatshumi amane abafele engozini zomgwaqo kusukela ngelanga leKhisimusi.
Indaba zengozi zomgwaqo eziphuma ezindabeni ziveza ukuba ngelanga leKhisimusi langelanga elilandelayo langoMgqibelo kufe abantu abalitshumi lasitshiyangalombili 18 endaweni ezitshiyeneyo zelizwe. Kuthi ngeSonto eMutoko kufe inani elifanayo ngemva kokugqikilana kwezimota zohlobo lweIsuzu Twin Cab kanye leBMW zona ebezithwele imuli ezimbili.
Ngesonto ntambama izakhamizi zeGwanda zisele zikhuza imihlolo kulandela ukutholakala kwesidumbu somtshayeli phezulu kwesihlala ngemva kokuba imota yakhe itshayane leyinye yaphuma umgwaqo.
UMnu Tatenda Chinoda olwela ukuqedwa kwengozi zemigwaqo iRoads for Life Champion phansi kwenhlanganiso yomanyano wamazwe abensundu oweAfrican Union le World Bank njalo esebenza lohlangothi olweTraffic Safety Council of Zimbabwe uthi kuyadanisa ukuthi kulelikhefu ingozi ezibekhona zidalwe ngabantu abazihambela ngezimota zabo.
"Sihlezi sikhala ngabatshayeli bamaKombi lezimota ezithwala uzulu kodwa okwamanje ubufakazi obukhona bukhomba ukuthi abatshayela izimota zabo yibo abahamba phambili ekudaleni ingozi ezimbi emigwaqweni kulesisikhathi sekhefu."
Uthi njalo okudala lezingozi yisiqubu lezimota eziyabe zihamba ngaso ngakhoke ukhuthaza uzulu ukuba atshayele ngonanzelelo sisiya kukhefu lomnyaka omutsha.
"Okudala lezingozi kakhulu yizimota ezigijinyiswa kakahulu , kodwa isiqubu kasibuyi sodwa, kubalomdlandla obakhona, njengoba kuzathakazelelwa umnyaka omutsha uzulu uzajabula adlulise amalawulo kodwa asijabuleni okulomkhawulo"
Isikhulimeli samapholisa eZimbabwe, uMnu Paul Nyathi uthe basaphatheke ngodaba lweMutoko ngesikhathi sifuna ukuzwa inani lalabo asebefile ngalesisikhathi sekhefu esithi basazohlala phansi bexwayisise.
UMnu Daniso Mpande oyisakhamuzi seGwanda yena uthi ubona sengathi okudala ingozi zemigwaqo lezi yikuthi abantu basuka bejabule okwedlulisa amalawulo.
"Abantu bone bayajabula ngalesisikhathi sikaDecember, kuyabe kukhona okuncane ezikhwameni kuphume kumaBonus kulayonale ikhisimusi abantu abayithathela phezulu , ikhisimusi yona ivele iyinkonzo lilanga lokuthi ngabe abantu bayakhonza bejabule okulinegeneyo."
Nyakenye kufe abantu abedlula ikhulu 111 engozini zomgwaqo ngesikhathi sinye sekhefu lekhisimusi. Ngokuqhamuka kweCovid 19, abantu bebesithi mhlawumbe lonyaka leli nani lizakwehla ngenxa yenkhuthazo yokuthi abantu bengahambahambi njengemvama besiyahlangana labemuli labangane bebanengi ngekhefu leKhisimusi lomnyaka omutsha lonyaka, emizameni yokuvimba ukuthelelana lula leli gcikwane.
