Kuhlelo lwethu Liphuma Lendaba Litshona Lendaba sixoxa loMnu. Thembinkosi Sibindi umgcinisihlalo webandla le MDC-T esigabeni se Matababeleland North sihlaziya umhlangano webandla leZanu PF owenzelwa kulelidolobho.
USibindi uthi kulamakhulu abasekeli bebandla leli abaqale ukuza kulelidolobho ngoMvulo.
"Into engani iyahlupha, iyasikhathaza kakhulu njengabahlali bedolobho leVictoria Falls yikuthi kwaqala kubuya amapholisa, ama CIO lamasotsha amanengi ayiwo ahlukuluza abantu endaweni zokunatha. Uyaphongukubuzwa kuthiwe uvela ngaphi utshaywe," kutsho uSibindi.
Uthe kubonakala ungani sekumele abantu bengahambi ebusuku osekwenza ukuthi abantu bazibuze injongo yomhlangano lo. Uthi akusasebenzeki ngoba abantu abathengisa ezitaladeni bayathathelwa impahla.
Iziphathamandla zebandla zibikwa kuyizo ezihlala emahoteleni kuthi abasekeli mathupha bona badinga ezindlini ezibhadalwa imali engaphansi osekubangele ukuthi abalezindlu abanye babhadalise abafuna ukuhlala.
"Uzulu we Victoria Falls kathabanga. Abanye abe Zanu PF esibaziyo kabathabanga. Bathi akusajabulisi ku Zanu PF ngoba ungakhuluma uyaxotshwa. Ungayenza anything okubona kuliqiniso uyahlukunyezwa," kutsho uSibindi.
