Inhlanganiso yababalisi eye Zimbabwe Teachers’ Union isixwayise abazali, ikakhulu labo abalabantwana abafunda behlala ezikolo, ukuthi bengalingi bahambise abantwana ezikolo ngoba kuyabe kungela bantu abazabamukela.
IZIMTA lezinye inhlanganiso zababalisi zithi kukhangelelwe ukuthi amalunga abo azakhalala umsebenzi ngoLwesibili.
Inhlanganiso zababalisi eziphansi komanyano weFederation of Zimbabwe Educators’ Union ezigoqela iZIMTA kanye leProgressive Teachers’ Union of Zimbabwe, zithi ngamanga aluhlaza tshoko imbiko ethi sebevumelene lohulumende ngeholo labo.
Inhlanganiso zababalisi lezi zithi ababalisi baqhubekela phambili ngenyathelo labo lokukhalala umsebenzi kusukela kusasa.
Umgcinisihlalo weZIMTA ezansi yeMaNdebeleni, uMnu Akuneni Maphosa, uthi abazali akumelanga bazihluphe ngokuhambisa abantwana ezikolo.
Abazali sebeveze imbono etshiyeneyo ngenyathelo elithethwe ngababalisi elokukhalala umsebenzi.
Omunye wabo, uNkosazana Anele Mnyandu, uthi ababalisi bekumele bakhulumisane lohulumende ngesikhathi kuvalwe izikolo ukuze izifundi zingaphazamiseki.
Umbono wakhe usekelwa nguMnu. Ngqabutho Ndlovu oyethesa uhulumende umlandu ngokukhuphula iholo labodokotela kuphela etshiya ezinye izisebenzi zisidla ingqweqwe zomlomo.
UNkosazana Lungile Masuku uthi kuyadingeka ukuthi iholo lababalisi likhuphulwe ngoba sebeleminyaka bethola imali efanayo.
UNkosazana Masuku uthi abantwana bazalahlekelwa yisikhathi sokufunda njengoba bebhekane lemihloliso etshiyeneyo okumele bayilobe kunyanga ezayo.
Ukukhalala umsebenzi kwababalisi lokhu kuza ngemva kokuba omongi bekhalale umsebenzi bekhonona ngeholo.
Uhulumende waxotsha omongi abakhalala umsebenzi waphinda wabaqhatsha. Lokhu kwabonakala njengendlela yokwethusela izisebenzi zikahulumende ezingafuna ukukhalala umsebenzi.
Inhlanganiso ezitshiyeneyo zababalisi zithi amalunga azo akumelanga esabe ngoba kulamagqwetha azabamela nxa uhulumende engabaxotsha umsebenzi.
