UManisipala wedolobho leGwanda usekhuphule imbhadalo yemithelo ngokuphindwe kahlanu osekutshiye izakhamizi zalelidolobho zisidla amalahle.
Izakhamizi zalelidolobho zithi imithelo emitsha ethulwe ngumanisipala weGwanda ingaphezu kwamandla abo njalo abasoze benelisa ukuthi bayibhadale.
Inengi lezakhamizi likhangelelwe ukuthi libhadale inkulungwane ezimbili zamadola $2000 ngenyanga, eyamanzi kanye lokuthwala izibi, kusukela kunyanga ezayo.
UNkosazana Lungile Masuku ohlala elokitshini leSpitzkop uthi kuzabanzima ukuthi benelise linhlanwulo kamanisipala.
“Ngibona ingathi sisebunzimeni ikhansili ingathi layo sisilwa labantu angazii vele ukuthi vele bakuthethe ngaphi ukuthi baze bakhweze kangaka amatarrifs abo sekhwele kakhulu okungangokuthi kawasekho affordable kumuntu nje an ordinary person oziphilela ngokuthengisa.”
Okusekelwe ngomunye njalo umhlali weGwanda uMnu John Mgobi ohlala elokitshini elidala eleJahunda othi okwenziwe ngumanisipala kuyamangalisa ikakhulu ngalesisikhathi inengi lihleli emakhaya.
“Abantu bayaphila abakhangelelanga amatariffs kuphela , kunjenje umhlaba yonke uyakahala sikhangele umkhuhlane weCoronavirus kodwa usuke ukhweze amatariffs kabuhlungu kanje imali yamatariffs la izavela nga, sicela wena okhweza lokhu kumbe lina elikhweza lokhu like libe lonembeza.”
UMnu Molvin Dube obona ngokukhitshwa kwembiko yenhlanganiso yabahlali balelidolobho eyeGwanda Residents Association uthi bahlangane lomanisipala bamtshela ukuthi inyathelo alithetheyo kalikho emthethweni.
“Ikhansili akula maresolutions kumbe imbono ehlanganiswe ngamaCouncillors ukuze bafike esigabeni sokuthi amanzi akhwele lezinto zonke zikhwele zifike kucharge le abakade sebeyifakile kusuke kuadministration side kuphela akuzange kuvunyelwane ngakho sicelile ukuthi ikhansili ibuyele iyehlala phansi ilandele iStatutory Instrument eyiyo elandelwayo ukukhweza izinto zonke.”
Ukuqonga kwemithelo lokhu kuza ngesikhathi kulembiko eveza ukuba iholo lezisebenzi zikamanisipala likhuphukuile njalo inengi leziphathamandla sezihola amadola aphezu kwenkulungwane ezilikhulu.
UMeya weGwanda uMnu Jastone Mazhale uthi umthelo wamanzi ukhwezwe linyathelo elithethwe lugatsha lwamanzi olweZimbabwe National Water Authority- ZINWA olukhweze intengo yamanzi ngokuphindwe kantathu.
“Imali yeZinwa inengi kakhulu, ngingakutshela ukuthi iZinwa isi biller $14 million per month, ukuthi yayisuke biller $120 000 before June, yaya ku $5,4 million kathesi siku $14 million njalo ukukhwela kweholo lezisebenzi kalikhweza yimunicipality ye Gwanda bale Association yabo njalo le Ministry of local Government ibisitsho njengazozonke izisebenzi zikahulumende ukuthi umuntu ophansi uhola imali engakanani.”
Ngaphandle kokuqonga kwemithelo le, abafelwa yizihlobo zabo sokuzamele batshone ezikhwameni ngoba ukubeka umuntu engcwabeni likamanisipala sokuzabiza phose inkulungwane ezimbili zamadola $1,950 abantwana kusiya kumadola phose azinkulungwane ezilitshumi $9,100 abadala.
