Iqembu elingene lonyaka kusigaba seCastle Lager Premier Soccer League eleArenel linqotshwe okwakuqala selokhu liqale ukudlala kusigaba saphezulu lapho litshaywa nge 3 ka 1 ngeleCaps United emdlalweni obusenkundleni yeRufaro.
Abahlohlele iqembu leCaps United nguLot Chiunga, yena olitshayele emambuleni kabili, kanye loRalph Kawondera, kuthi eleArenel lona lihlohlelwe nguBrian Jaravaza.
Phambilini kwemidlalo yanamhlanje iqembu leArenel belibe ngutshiki lobhanqa kumidlalo emithathu ebeseliyidlale kusigaba saphezulu okutsho ukuba lilemiklomelo emithathu.
Iqembu leCaps lona selilemiklomelo eyisithupha ngemva kokunqoba kwalo eleArenel namhla.
Elinye iqembu lalo elingene lonyaka kusigaba saphezulu eleChegutu Pirates linqobe okwakuqala selokhu liqale ukudlala kuPSL ngemva kokutshaya eleGreen Fuel nge 1 ka nya ngaseBaobab.
Ohlohlele iChegutu Pirates nguRussel Chifura njalo limpumela itshiye iqembu leli lilemiklomelo emine ngemva kwemidlalo emine.
Umdlalo obuphakathi kweChicken Inn leZPC Kariba uphele zingutshiki lobhanqa 0 ka 0 enkundleni yeLuveve.
Imidlalo yePSL iqhubekela phambili kusasa ngoMvulo lapho iqembu leHerentals elizemukela khona eleFC Platinum ngaseRufaro, iqembu leTelOne lizadibana leleHighlanders ngaseBata, iSimba Bhora izangqikilana leHwange ngaseWadzanayi, iBulawayo Chiefs izadlala leYadah eLuveve, iNgezi Platinum Stars izatshayana leManica Diamonds ngaseBaobab kuthi iqembu leBikita Minerals lizadibana leleDynamos ngaseSakubva
Forum