Izulu lesiqotho njalo ebelilomoya libangele umonakalo omkhulu endaweni zelizwe ezitshiyeneyo ngoMvulo ladiliza imizi eminengi, kwathi amakilasi okufundela asala engela phahla kwezinye izikolo.
Esinye salezi zikolo yiTokwana Primary School emmangweni wePlumtree.
Isiqotho lesi sibikwa besizimbumbuluza zamatshe amakhulu njalo sibulele izifuyo kwezinye indawo.
"Kuhambe amablocks amabili; iblock ebilehofisi engingathi ibithwele nje yonke into yesikolo leblock yaboGrade 1," kuchasise isakhamuzi sakoTokwana, ePlumtree uMnu Khumbu Dube.
Usobhuku walindawo uMnu Agrippa Mlalazi laye ufakaze ngomonakalo lo wathi lemizi eminengi ithwelwe ngumoya izakhamizi zasala zingela ndawo zokuhlala.
Isakhamuzi seJutjume uMnu Difa Dube ukhuthaze uhulumende ukuthi angenele ancedise izikolo eziwelwe ngumonakalo lo.
"Uhulumende siyamdinga, siyamcela kakhulu ukuthi ancede ngoba umonakalo lo mkhulu kakhulu njalo kumele ulungisiswe ngokuphangisa," kutsho uMnu Dube.