Ikhomidi yedale lephalamende ebona ngokulotshwa kwesisekelo sombuso eyeCOPAC yethule ugwalondaba lebukenjini, iwebsite ngolweSibili. Iwebsite le ibikwa izaphathisa izizalwane zeZimbabwe ezihlala kwamanye amazwe ukuthi ziphe imibono yazo.
Omunye wabagcinisihlalo benhlanganiso yeCOPAC uMnumzana Munyaradzi Paul Mangwana emkhosini wokwethula iwebsite le uchothoze inhlanganiso zezindaba esithi zikhetha ukwethula imbiko emibi kudaba lokulotshwa kwesisekelo esitsha, khona kukhona okunengi okuhle okwenziwa yiCOPAC.
Ikheli yewebsite kulabo abangafuna ukuyakiyo ithi:www.copac.org.zw. Kuwebsite le iCOPAC ichasisela uzulu izihloko zalokho okumele kuqakathekiswe ekulotshweni kwesisekelo esitsha. Imemezela njalo inkuthazo yokuqakatheka kokuthi uzulu aphatheke kuhlelo lokupha imibono ezangena kusisekelo sombuso.
Omunye wabagcinisihlalo bekhomidi yephalamende ebona ngokulotshwa kwesisekelo sombuso iCOPAC, uMnumzana Edward Mkhosi uthi iwebsite le ipha njalo uzulu indaba eziphathelane lokuqhubeka kohlelo lokulotshwa kutsha kwalesisikelo.
Ingcwethi ecubungula ezombusazwe uMnumzana Walter Nsununguli Mbongolwane uthi imibono ezafakwa yizizalwane zeZimbabwe kuwebsite yeCOPAC ilakho ukungasetshenziswa.
Kunjalo nje isiphathamandla senhlanganiso yeMatebeleland Constitutional Reform Agenda-MACRA uMnumzana Effie Dlela Ncube uchasisa ukuqhubeka kohlelo lokuthapha imibono kazulu.
