Abenhlangothi ezitshiyeneyo zempilo abagoqela abamabandla ezombusazwe labenhlanganiso ezizimeleyo ezitshiyeneyo, bathole ithuba lokuxoxisana lomeli weNkulumane edale lephalamende, owebandla le MDC, uMnumzana Kucaca Phulu, ngomthetho wemitshado ozavumela ukuthi abantu bahlalisane kungela mitshado njalo babelane impahla nxa sebesehlukana.
Ingxoxiswano le eqoqwe ngabenhlanganiso yamabandla ezokholo eye Evangelical Fellowship of Zimbabwe (EFZ) kanye le Citizen Africa Foundation ibihlose ukwabelana ulwazi ukuze uzulu azwisise okumnunyethwe ngumthetho lo.
Ngomthetho omutsha lo, umasihlalisane usezavunyelwa, lotshadileyo uyavunyelwa ukuba abe lomasihlalisane ngokusemthethweni njalo inengi libona lokhu kuzadiliza imitshado eminengi.
Inengi likhanye lingavumelani lakho lokhu bethi sekuzadala ukuchitheka kwemizi eminengi, kuthi ke abatsha bathi abasaboni isizatho sokuba batshade bona belakho ukuthi bazenzele umasihlalisane ngokusemthethweni.
UMnumzana Kucaca Phulu omele iNkulumane edale lephalamende, ekubandla le MDC, uthi kukhona okuhle ngomthetho lo.
“Zikhona izinto ezinhle nge marriage bill le,ayisavumeli ukuthi abantwana abancane abaleminyaka engaphansi kwe 18 bathiwe batshadile, ukwendisa sokulicala,izinduna sezivunyelwa ukuthi lazo zitshadise.Sekuthiwe sekuzavunyelwa ukuthi kube le Civil Partnership, umasihlalisane.Ingozi ebonwe ngabafundisi yikuba sekuzasuka kuhlukuluze labo batshadileyo. Uzathi utshadile,uthole ukuthi umkakho sengene kukhonokhu okuthiwa yi Civil Partnership.Isimanga ngalokhu yikuthi ungangena kuma civil partnerships angu 10,angu 20 akula ndaba so ngezinye indlela sesivumela ukuthi abantu bangene emitshadweni evumela omama abanengi .”
Umfundisi uReverend Milzon Ndlovu owenkonzo yeBrethern In Christ Church uthi ubona lokhu sokuphambana lebhayibhili.
“Ngibona okuyinto lokhu kungaqondanga, ngendlela yokuthi kuyalimaza ama marriages akhona khathesi. Futhi okuyinto lokhu aso marriage,yi partnership ukuthi nga kuthiwa kuba lesection yakho le somewhere else okuyakhulunywa khona ngama partnerships. Imarriage kumele ihlonitshwe ngabantu bonke abangena kuyo labaphandle bayihloniphe ingavumeli ama partnerships.”
Umnumzana Kilton Moyo ongumqondisi weCitizen Africa Foundation uthi kakuqale kukhulunyiswane lozulu kabanzi ngalumthetho.
“Nge bill le entsha ayimbi yona ngokwayo,inhle uhlupho nje ngu clause 40 nguye esikhala ngaye,asikwazi ukuthi uvele ngaphi udingani ngoba ngulwana ofuna uku legalizer ukutshaya amapoto at the expense of marriages.So nxa sikukhangele thina sibona engani kuzasidalela uhlupho olunengi ukudiliza imizi,lemitshado yabantu.Esikhala ngakho yikuthi kucubungulwe kuhle kumbe kukhitshwe yonke i section ingabi khona .”
Umthetho lo omutsha uvumela ukuthi abahlaliseneyo babelane impahla nxa omunye esefuna ukuphuma ekuhlalisaneni kwabo. Ngalokho osakhulayo uNokuthula Nyathi uthi yena kasaboni indingeko yokutshada nxa elakho ukuthi athole inzuzo zomuntu otshadileyo yena ekumasihlalisane.
“New Marriage Act Bill le, njengomuntu omutsha ngisala ngizibuza ukuthi whats the point of getting married nxa kuyikuthi ngiyakwanisa ukuthi ngithole ama benefits okutshada but ngingatshadanga and ayi protect anyone. So lokhu sokuza promoter ama gold diggers lokuthi abafazi lamadoda abatshadileyo babe labangane outside marriage kucina seku affecter i moralility yethu as a nation and as Zimbabweans.”
Umnumzana Christopher Munetsi ongumcebisi kuhlalakahle yemuli uthi yena okumxaka ngamandla yikuthi umasihlalisane ubanjwa ngcono kulothsadileyo.
“Ngithe ngisizwa into le,kimi iyangixaka kakhulu ngoba ifakwe ngaphansi ko mthetho wokuthathana, marriage act. But ayisikho marriage khona ngokwakho, yibungane. Osokungixaka yikuthu ku treater even better than i marriage, sokuzaletha ukungahlaliseki kuma marriage esesilawo, actually kuzobulala ama marriage esilawo.
Abakunhlangothi ezitshiyeneyo zempilo, bathole ithuba loxoxisana kanye lengcazelo kuPhulu olilunga ledale lephalamende njalo eligqwetha empilweni ngokuguqulwa komthetho womitshado, lapho osokufakwe isahluko sokuthi umasihlalisane abe semthethweni. Abangene umhlanano wanamhlanje bavumelene ukuthi lokhu okuka masihlalisane kukhitshwe kuvele kungabi khona kulumthetho. Kuthi abacebisa izimuli bakhala ngokuthi umasihlalisane uphathwa ngcono kulotshadileyo. Inengi likhanye lingathakazeleli lindaba kamasihlalisane bethi sekuyikuchitheka kwemizi, njalo sesilahlekelwa yibuntu bethu.
