Abamabandla ezokholo lwesiKhristu bamanyane lamapholisa edolobheni leGwanda ngoLwesithathu benza umbuthano wokukhulekela ukuthi kubelokhetho olulokuthula njalo buphele ubugebengu kulelidolobho.
Abamabandla okholo lweSiKhristu abeGwanda Pastors’ Fraternity benze lokhu kulandela ukuqonga kwenani lamacala okubulala lawokutshontsha izigebengu zihlomile.
Ekhuluma embuthanweni oqhutshelwe emavikilini awePhakama, osaphethe isihlalo somkhulu wamapholisa eZansi yeMaNdebeleni, uAssistant Commissioner Clayman Mguquka, uthi inani lamacala asedalwe lonyaka liqonge ngesilinganiso sokulitshumi ekhulwini - 10% lapho kuqhathaniswa lanyakenye kusukela ngoZibandlela kusiya kuMbimbitho.
Amacala avamileyo abalisa awokubulala awokutshontsha impahla lezifuyo kanye lawokudlengulwa kwamantombazana labomama.
UNkosazana Amanda Ndebele, umqondisi wenhlelo zeOne Stop Centre esibhedlela esikhulu seGwanda, uthi labo abadlwengulwayo kumele babikele amapholisa ngesiphange phange ukuze basizakale.
“Loba kuphakathi kobusuku hamba uyebika emapholiseni aseduzane lawe bazakusiza ukuthi uxhumane leOne Stop Centre ukwenzela ukuthi khona lowo umakudlwengula nxa ebephila legcikwane leHIV/AIDS wena odlwenguliweyo uzancediswa eOne Stop Centre ukuze wena ungawubambi lowo mkhuhlane njalo nxa kuyikuthi ubusufike ebangeni lokuthi uzithwale asithi ungumama obanjwe iganyavu, ungaphangisa ukuyabika kungakadluli 72 hours ulakho ukuncediswa ukuthi ungazithwali.”
UMguquka uthi ukuqonga kwenani lamacala la sekufuna uzulu abambisane lamapholisa ukuze buphele ubugebengu. Ukhuthaze uzulu weZansi yeMaNdebeleni ukuthi enqabele udlakela lwezombangazwe ngesikhathi sokhetho.
“Njengoba sesilanda ukhetho manini ngithathe lelithuba ukulixwayisa lonke zakhamizi zeGwanda leZansi yeMaNdebeleni ukuthi litshiyane lodlakela lwezombangazwe. Asitshiyanene laloba yiluphi udlakela lwezombusazwe ngesikhathi sokhetho.”
Amazwi akhe agcizelelwe nguMayor weGwanda uMnu. Knowledge Ndlovu, okhuthaze izakhamizi ukuthi zingaxatshaniswa ngezombusazwe.
“… Konke lokhu esikwenzayo asikwenzeni ngokuhloniphana ukuthi kuze kuphutshe, freedom of association, freedom of speech. Ngilethemba lokuthi sisiya kuma elections sonke sizahloniphana ukuze sikhethe labo esifuna ukuthi basimele ngendlela eqotho elokuhlonipha phakathi.”
Umgcinisihlalo weGwanda Pastors’ Fraternity okhokhela ibandla leKingdom Life Worship Centre, uMfundisi Mesuli Nkomo, uthi bamanyane lamapholisa kulumkhankaso ngoba ibandla likhathazekile ngobugebengu osebukhona kulelidobho.
“Sokulo budlwangudlwangu obunengi kakahulu. Banengi abantu abagwaziweyo abalinyaziweyo omunye wagwaza ngale eSpitzkop, eJacaranda abanengi kakhulu abalimazwayo. Thina njenge Church njengabantu abamelela uNkulunkulu akuvumi sithule, sathi manini sidingeni abomthetho sikhulume labo sibuyeni sithandazeni kodwa sikhulumeni simele ubugebengu. Asithandazeni sithandazele ilizwe lethu sibisene ukuthula iVerse lalamhla lisithi lwisela ukuphila ngokuthula emuntwini yonke. Akube lokuthula akube lokubambana akube lokuthandana emphakathini wakithi.
Umbuthano walumkhankaso ongenwe ngabantu abanengi uqhutshwe phansi kwendikimba ethi ‘Say No To Crime’.
