Liviki kuhlelo Liphuma Lendaba Litshona Lendaba umsakazo weStudio 7 ulethulela ingxoxo loMnumzana Greater Vodloza Sibanda, ilunga lenhlanganiso yoMhlahlo kaMthwakazi.
Abenhlanganiso le yibo abaqoqa umbuthano wesikhumbhuzo sempi yeGadade emkhosini ozakwenziwa ngoMgqibelo mhlaka 7 Mfumfu, 2015 khonale eGadadi duzane lakoBulawayo.
Lumbuthano usuleminyaka embalwa usenziwa njalo owalonyaka ukhangelwe ukuba labantu abanenganyanana kulanyakenye.
"Sesile minyaka ethile sisenza lesi sikhumbuzo njalo silethemba lokuthi lonyaka kuzaba labantu abanengi" kutsho uSibanda.
"Ngakhoke Mthwakazi omuhle, ngithanda ukulikhumbuza ngomcimbi oweGadadi lo. Liyanxuswa lonke ngobunengi benu ngoMgqibelo ozayo mhlaka 7 Lwezi 2015. Umcimbi uzaqala ngabo 9 ekuseni lize liyetshona ilanga. UMthwakazi ozayo unxuswa ukuthi eze egqoke ezesintu. Kodwa akutsho ukuthi abangelazo bangezi. Inhlanganiso zakoMthwakazi ziyanxuswa zonke. Kuzaba nethuba lokwethula imibiko ngabenhlanganiso ezehlukeneyo zikaMthwakazi".
USibanda uqhubeka ethi "Kunengi okuqoqiweyo kokulibazisa abantu okugoqela imbongi, imbali, imbube lokunye. Kuyabe kukokhethomthandayo. Asihlanganeni khona".
IGadadi ingumango ongamakilomita angamatshumi amathathu-30km ukusuka koBulawayo emgwaqweni oya eHarare, abavela empumalanga lakho kuyabe sokusele amatshumi amathathu amakilomita-30km ukuyafika koNtuthu.
Kule ingxoxo uSibanda utshele iStudio Seven ukuthi akusoze kube lemicimbi cimbi ehlukeneyo kuphela embuthanweni lo, kodwa lokufundisana ngezamasiko.
