Umthwethwandaba usanda kwethula isinqumo esithi umanyano weMovement for Democratic Change Alliance awulalungelo lokuvimba ibandla leMDC-T elikhokhelwa nguNkosazana Thokozani Khupe ukuthi lixotshise amalunga eMDC Alliance edale lephalamende.
UMaKhupe labanye bakhe basanda kuxotshisa edale lephalamende uNkosazana Thabitha Khumalo, uNkosazana Lilian Timveous, uMnu. Charlton Hwende loMnu. Prosper Mutseyami abakhethwa nguzulu ngomnyaka ka2018 bengaphansi komanyano weMDC Alliance.
Idale leSupreme Court lethula isinqumo esithi uMnu.Nelson Chamisa, okhokhela umanyano weMDC Alliance, kakhethwanga ngemfanelo ngakho kumele kwenziwe umhlangano omkhulu wokukhetha ozangena esikhundleni sikamuyi uMorganTsvangirai, owabhubha ngomnyaka ka2018.
UChamisa wancintisa kukhetho olwenziwa ngomnyaka ka2018 okwakuncintisa uMnangagwa, owanqoba abanye ababencintisa abagoqela uMaKhupe, owathola amavoti ayingcosana.
Umthethwandaba weElectoral Court wacina uhlala phansi wathatha isinqumo sokuthi uMnangagwa wanqoba kukhetho lolu. Kodwa uChamisa uthi wanqoba uMnangagwa ngamavoti amanengi okumangalisayo ikhomishini yeZimbabwe Electoral Commission yaphekapheka impumela yokhetho lolu.
IZEC iyakuphika lokhu isithi uMnangagwa wanqoba kukhetho lolu.
Ukuze sihlaziye ukuxokozela kumanyano weMDC Alliance lebandla leMDC-T, sixhume uDokotela Nkululeko Sibanda, isikhulumeli sika Chamisa, uMnu. Dan Moyo okubandla elikhokhelwa nguMaKhupe loMnu. Joseph Tshuma okubandla leZanu PF.
