Kuyaxokozela kukhansili yeVictoria Falls phakathi kwamakhansila, izakhamizi kanye lomphathintambo kahulumende obona ngezamadolobho ngokumiswa umsebenzi okwesikhatshana kukamabhalane omkhulu wedolobho leli, uMnu. Ronnie Dube, okuthiwa wenza ubukhohlakali obumangalisayo.
Kubikwa ukuba ohola ugatsha lweLocal Government and Public Works uMnumzana Daniel Garwe kahambelani lokwenziwa ngusodolobho uMnu. Prince Moyo owamisa uDube umsebenzi esithi wenza ubukhohlakali.
Indaba yenkohlakalo le yadungwa nguMoyo mhlaka 2 Mpalakazi. UMoyo wamisa uDube umsebenzi emethesa icala lokuthengisa umhlabathi ngendlela ezingaqondanga, ukupha i-tender kunkamapni yeCascade Enginnering Consultations lokunye okuthiwa kwakungekho emthethweni
Kwathi mhlaka 6 Mpalakazi uGarwe walobela uMoyo incwadi ukuba aqenqule lesisinqumo, uDube abuyele emsebenzini, ethi sifiphaza isifiso lamalungelo ezakhamizi.
Kwathi njalo mhlaka 11, uMoyo waphendula uGarwe ethi yiso isinqumo esathathwa yizakhamizi ezamthumayo. Kusukela lapho akusabanga lokuphumula ngoba amakhansila, izisebenzi kanye loDube sebebizwe kabili eHarare nguGarwe ngodaba lolu, ngapho izakhamizi lazo zisenza imihlangano yokuba uDube engabuyela bazaphuma ijumo bayetshengisela ekhansili.
Izolo inhlanganiso yeVictoria Falls Combined Residents Association kumbe iVIFACORA leHwange District Residents Association ziqhube umhlangano eChinotimba Hall lapho ababikele izakhamizi ukuba udaba lolu seluphanyekwe ezandleni zabomthetho.
UDube kwakufuze abiselwe emsebenzini ngoLwesibili, kwehlula. Lamuhla kwehlule njalo ngokuchaza kuka Mmnumzana Trymore Ndolo olilunga leVIFACORA, ethu usodolobho u Moyo kabuyanga emhlanganweni lo.
“Abasaxoxanga ngakho, bathe umuntu ongabe elolwazi ngendaba kaTown Clerk ngusodolobho obengekho lamhlanje kwathiwa lapha lapha ozabakhona yena yikho abangaxoxa khona.”
UNdolo uthi kulandela uphenyo olwenziwa ngabeCommission of Inquiry, bathole ubufakazi bokuba uDube unakanelwa ukuba ulamacala edlula la awetheswayo, njalo abakukhangeleleyo yikuba uDube abotshiswe.
“Kuyasimangaza kakhulu ukuthi uminister ahluphe kangaka. Kulokuhlukumezana kakhulu ama counciullors amangengi sehlutshwa even le lawyer lekhansilini lalo liyahlukunyezwa abantu sebephila under threats kodwa thina asibuyeli emuva.”
Izakhamizi lazo zibophe findo linye. Owayengumsekeli kasodolobho uMnumzana Norris Nyathi uphawule afanayo emhlanganweni wayizolo.
“UMinister engasethuseli,nxa kukhona obhalayo kabhale ukuthi uNorris Nyathi uyakucela uzohlala phansi lezakhamizi ngoba into oyenzayo is unlawful. He cannot dictate on what we should do, yithi esilohlupho lapha.”
Owalwa impi yenkululeko, uMnumzana Christopher Ndiweni, laye ubemumethe angemnandi.
“Lingayekela umuntu ezotshontsha lina liyizakhamuzi liyabelimyekelelani. Lifana losobhuku otshontsha inkomo zami mina ngimqhatshile, lingaya eMashonaland angeke ukubone lokhu.”
Owesifazene ozethule ngokuba nguNaka Bonnie uthi yena wavivinywa ngendaba le, ethi kahambe uDube.
“Abantu singabi ngamagwala. Uzalungiselwa ngubani indaba yakho kodwa hambani liyetshela uDube ukuthi sizamkhipha njengo Mugabe.”
Emaphethelweni omhlangano lo, ngalizwi linye, izakhamizi zivumelane ukuyatshengisela ekhansilini, funa uDube abiselwe emsebenzi abe Zimbabwe Anti-Corruption Committee, amapholisa kanye labe Commisssion of Inquiry bengakagqibi uphenyo abaphezu kwalo ngenkohlakalo yonke nje okuthiwa yenzakala edolobheni leli, okugoqela lamakhansila kanye labanye abaholi bengatsha zekhansili.
Imizamo yokuxhumana losodolobho uMoyo kanye loDube iyehlula ngoba omunye engaphenduli, omunye ethi kazimiselanga ukukhuluma.
Isikhulumeli seZACC, uNkosazana Simiso Mlevu, uphendule imbuzo esimthumele yona enkundleni yokuxhumana eyeWhatsApp esithi basahlolisisa udaba lolu.
Forum