UMongameli Emmerson Mnangagwa, uNkosikazi Grace Mugabe, inkokheli yakwamanye amazwe labanye basesililweni sika Sam Nujoma wakweleNamibia, ozangcwatshwa kusasa. UNujoma waba ngumongameli wakuqala onsundu wakulelolizwe.
Ngesikhathi uMnangagwa esesililweni lesi, kuyaxokozela kubandla lakhe eNkabazwe, koBulawayo leBeitbridge okulabanye abathi bazavimba imizamo yokuthi ahlale embusweni kungafika umnyaka ka2028, okugqitshwa khona amahlandla ombuso wakhe.
Sokuphoselwana aqhatha phakathi kwamalunga ebandla leli njalo labakunhlanganiso yeZimbabwe National Liberation War Veterans Association, abazaqhuba imihlangano etshiyeneyo ngempelaviki. Kunhlanganiso le kulabesekela ukuba uMnangagwa eqhubeke esembusweni kube labanye njalo abakuphikisayo.
UMnangagwa yena uthi kafisi ukuqhubeka esembusweni kungafika umnyaka ka2028. Sixoxe ngodaba lolu loMnu. Malaki Nkomo, ilunga lebandla leZanu PF, othi ukuxabana lokhu kukhulunywa ngabantu abangamalunga amanye amabandla hatshi elibusayo.
“Siyakuzwa konke lokhu okukhulunywa enkundleni zokuxhumana. Thina sibambene ngodaba lolu,” kutsho uNkomo.
Kodwa uMnu. Fortune Mlalazi, olandela ezombusazwe ezimele, uthi kuyaxokozela kubandla leZanu PF ngenxa yodaba luka Mnangagwa “ngakho-ke sibona engani kuzachitheka igazi.”
Forum