Kulokuxokozela eZimbabwe lapho amapholisa athwalise nzima amabandla aphikisayo agoqela eleCitizens Coalition for Change, iMthwakazi Republic Party lamanye okucatshangelwa ukuba afuna abalandeli bawo batshengisele emigwaqweni bekhonona ngokubotshwa kwabanye babo langokuxotshiswa edale lephalamende nguMnu. Sengezo Tshabangu abathi usebenzelana leZanu PF.
Ibandla leCCC lithi iZanu PF lohulumende kaMongameli Emmerson Mnangagwa bavala ubutshapha obenzakala ngesikhathi sokhetho olwaqhutshwa mhlaka 23 Ncwabakazi lonyaka njalo lolwama byelection okwavinjwa abaxotshiswa nguTshabangu ukuba bengangeni kukhetho oluqhutshwe mhlaka 9 Mpalakazi.
Ukuze sihlaziye udaba lolu sixoxe loMnu. Fortune Mlalazi okubandla leCCC loNkosazana Antonella Nare olilunga leZanu PF. UMlalazi uthi akumangalisi okwenzakala eZimbabwe ngoba ibandla leZanu PF kalithakazelela abantu abaliphikisayo.
Kodwa uNkosazana Nare uthi amalunga amabandla aphikisayo akhuluma amanga sonke isikhathi esenzela ukubukwa ngamanye amazwe.
UTshabangu waxotshisa edale lephalamende lakumakhansili amalunga eCCC amanengi esithi sebemiswe ukuba yingxenye yebandla leli.
Kodwa icele leCCC elikhokhelwa nguMnu. Nelson Chamisa lithi abamazi uTshabangu. Bacabangela ukuba usekelwa libandla leZanu PF abathi lifuna ukuguqula isisekelo sombuso welizwe ukwenzela ukuthi uMnangagwa ahlale esikhundleni okwesikhathi eside.
Forum