Ukubulawa komunye umhlali weKariba yindlovu ngoLwesithathu sokuveze njalo ukufuthelana okuqhubekayo phakathi kwabantu lenyamazana zasendle endaweni zelizwe ezitshiyeneyo.
Ngokubika kwamapholisa enkambeni yeNyamhunga, eKariba, umufi uMnu Scotch Gawa uhlaselwe yindlovu evela etshwaleni emadabukakusa.
Isikhulumeli sogatsha olubona ngezendle olweZimbabwe Parks and Wildlife Management Authority, ZimParks, uMnu Tinashe Farawo, uthi balusizi kakhulu ngalokhu njalo uthi uzulu kumele etshiyane lokuhamba ebusuku.
“Indlovu ibulele owesilisa eKariba, lesisehlakalo ngesinye sezehlakalo esilusizi ngazo, kodwa sikhuthaza uzulu ukuba angahambahambi ebusuku ngoba yikho lapho ezendle ezihambahamba khona njengalokhu okwenzeke kumufi”
Izehlakalo ezinje seziyinsakavukela ezabelweni ezinengi ezigoqela eManicaland, Mashonaland West, Masvingo laseMatabeleland North, ikakhulu ezigabeni eziduzane lalapho okugcinelwa khona inyamazana lezi, ama-game parks.
EMatabeleland North udubo lolu lubhahe kakhulu ezigabeni ezifana leVictoria Falls, eBinga laseHwange lapho abantu abakhala khona ngokuthi uhulumende ukhanya eqakathekisa inyamazana ukwedlula bona.
Abaholi bezigaba ezingcelezelane leHwange National Park, Forestry Area leZambezi National Park, bathi ukuhlaselwa kwabantu zinyamazana lezi sokuyiyo inkulumo yokuvukisana.
Ukhansila kaWard 3, uMnu Given Moyo uthi indlala yalonyaka yenza udubo lolu ludlondlobale ngoba inyamazana sezisondela kakhulu ebantwini zidinga ukudla. Uthi izilwane zona sezizingela libalele ezibayeni zezakhamizi kanye lasemadlelweni.
“Loba izulu line kuhle, awubasweli abantu abangatholiyo ngoba bethathelwa zinyamazana zendle. Abantu sebatshiya amasimu ngakho nxa sikhuluma ngenswelo, uhulumende kumele abakhangele abantu balapha ngoba inyamazana zakhe yizo ezibuya zibadlele abantu.”
Umsakazo weStudio 7 uxoxe lokhansila Moyo eseNdlovu Bus-Stop Turn Off, eHwange, lapho izakhamizi esezathutha khona zibalekela ukuhlaselwa zinyamazana.
“Abantu babelima betshaya isivuno esikhulu kakhulu ngabo 2000, kodwa sebatshiya kwabaliganga bebalekela zona inyamazana ezifana labondlovu. Sikhangele ebuyangeni, isilwane sithatha nkomo, mbuzi, donki abethembele kizo.”
Izakhamizi zeHwange seziqinise umkhankaso wokuthi uhulumende kumele apasise ukuguqulwa komthetho weParks and Wildlife Management Amendment Bill ukuze kubhadalwe imindeni yabantu abayabe bebulawe zinyamazana, abadlelwa izifuyo lezilimo kanye lalabo abayabe belinyazwe zinyamazana lezi.
UNkosikazi Hlengiwe Sibanda uthi kuyabahlukumeza ukuthi lanxa bengaze behlelwe ngumonakalo, kabakhalelwa njalo abahlawulwa.
“Kubelenkomo lazo sisifuyile ziyadliwa yizilwane kungelakubhadalwa. Inkomo yoneyo ebengiyithembile ivuke idliwe kodwa uzwe bethi olesibaya uzathengisa, njani thina sidlelwa. Singabantu nje koMvuthu, ubuyanga bandile.”
UNkosikazi Shylene Mathe ongaphansi kweNduna uShana yena uthi lezingadini yimpi phakathi kwabantu lenyamazana.
“Emasimini lengadini kunzima njengoba inyamazana zisenzenje kumele uhlale ulindile ukuze uthole khonokho okuncane. Indwangu ungekela ziyaqeda lendlovu lazo emasimini, njalonjalo kuze kuvunwe.”
Isakhamuzi seNdlovu uNkosikazi Margaret Nyoni, uthi ukufuthelana kwabantu lenyamazana zendle lezi sokwengeze izinga lobumpofu ebantwani.
“AKubuhlungu lokhu, uhulumende nga uyasihawukela. Kathesi sabiya siphwa amabedlana wahamba wahawula imali yokuthi ubhadale esikolo, uthenge impuphu, uziphilise nje kayikho.”
Udaba lokuguqulwa komthetho weParks and Wildlife Management Amendment Bill solwethulwa edale lephalamende, lwabuya njalo lwasabalaliswa kuzulu ukuze afake imbono yakhe.
Abantu abanengi bathi labo abayabe behlangane lodubo lolu kumele behlawulwe. Ungapasiswa lumthetho uzakwenza njalo ukuba izakhamizi zithole inzuzo kwezendle lezi, kuthi labo abalimeleyo bahlawulelwe nguhulumende ezibhedlela.
Nyakenye ugatsha lweZimParks luthi inyamazana zeganga zibulale abantu abangamatshumi amahlanu, 50, njalo inengi libulawa zindlovu lengwenya.
Forum