Inhlanganiso ekhankasela ukulondolozwa kwamalungelo oluntu eyeZimrights ithi kube lokuqonga okwethusayo kwezehlakalo zokuhlukuluzwa kwabenhlanganiso ezizimeleyo ikakhulu ezilwela amalungelo kazulu phakathi kwenyanga ezintathu ezisanda kwedlula.
Ekhuluma emhlanganweni lentathelizindaba eHarare ngoLwesithathu umqondisi wenhlanganiso le, uMnu Okay Machisa uthe iziphathamandla zenhlanganiso yakhe sezithwele gadalala ngokwethuselwa, esithi zithola imibiko yokuzethusela kubomakhalekhukhwini zixwayiswa ukuba zingaqhubi umsebenzi wazo ikakhulu ophathelane lesisekelo sombuso esitsha.
UMnu Machisa uthe inhlanganiso yakhe sikweze udaba lolu emapholiseni. UMnu Mfundo Mlilo ongumqondisi wenhlanganiso yeZinasu, laye ophatheke emhlanganweni lo, uthe abeZimrights bahlukuluzwa nje ngoba belimukisa uzulu ukuthi engavumeli uhulumende esephula amalungelo abo.
Ukwethusela lokhu kwenziwa hatshi kwabeZimrights kuphela kodwa lakwezinye inhlanganiso ezifana leyeZCTU leGapwuz, yona elamalunga asekucatsheni okwamanje ngemva kokwethuselwa ngamalunga ogatsha lukahulumende olweJoint Operations Command (JOC).
Ezinye inhlanganiso ezibhekane lokwethuselwa lokhu ngezifana leyeCounselling Services Unit, iCivic Education Trust lezinye kundawana ezitshiyeneyo zelizwe ezigoqela eMutare, Uzumba, Harare kanye leChitungwiza.
UMachiya uphinde wasola kakhulu ukuhlukuluzwa kwentathelizindaba esipha umzekeliso wokubotshwa kanengi-nengi kwentathelizindaba ezimeleyo uAnderson Manyere lokuhlukuluzwa okwenziwa enye njalo intatheli kunyanga ezisanda kwedlula, uStanley Kwenda okwabangela ukuthi ebaleka elizweni.
Ukuhlaziya udaba lokuhlukuluzwa kanye lokwethuselwa kwabalwela ilungelo loluntu lokhu uNtungamili Nkomo weStudio 7 uxhume ingxwethi ecubungula ezombusazwe uMnu George Mkhwanazi yena othi lokhu akumangalisi ngoba amapholisa kanye logatsha lweJOC besaziwa ngokusekela ibandla leZanu PF.
