KuWoza Friday liviki abaculi bengoma zomdumo weZimbabwe Dancehall edolobheni lako Bulawayo bathi lumculo uya ulokhu umemetheka kulelidolobho loba nje amathuba okuba betshaywe emsakazweni emalutshwane.
Intathelizindaba yeStudio Seven uJoseph Njanji uxoxe labaculi abacindezela ngaphansi kwenkampani ye Wisdom Records ngesimo lekusasa yalumculo ko Bulawayo.
Umculo we Zimbabwe Dancehall ngumculo oqalwe ngabasakhulayo belingisela umculo we reggae dancehall odabuka elizweni le Jamaica njalo yiwo osungumculo othandwa ngabasakhulayo abanengi kwele Zimbabwe.
Lumculo uqalele esigodlweni iHarare njalo abaculi abacula besesigodlweni sebedume kude lakhatshana.
Loludumo yilo oludingwa ngabaculi bengoma ze Zimbabwe Dancehall abasebenza besedolobheni lako Bulawayo bona abathi ukucindezela ingoma zohlobo lwe dancehall bayacindezela kodwa ukwaziwa kwemisebenzi yabo kunzima.
Kesizwe osebenza labe Wisdom Records okuyinkampani ecindezela ingoma ze dancehall ko Bulawayo uKing Krud ekhuluma ngobunzima ababhekane labo njengabaculi be dancehall ko Bulawayo.
UKing Krud uqhubekele phambili wathi loba nje umculo we Zimbabwe dancehall usaziwa njengomculo othandwa edolobheni le Harare bakhona abaculi abaphuma ko Bulawayo asebetshengise ukuba lumculo uthandwa elizweni le Zimbabwe jikelele.
Omunye walabo ngu Langa lo ongena enkundleni ngengoma ethi Our Love yona ayicule ndawonye lo Centre Party.
Lumculi ozibiza ngegama elithi Centre Party uleminyaka edlula elitshumi ecula ingoma zohlobo lwe Zimbabwe dancehall njalo uthi loba nje engaziwa njengabanye aqalisa kanye kanye labo abasebenza besesigodlweni ikusasa yalomculo inhle.
UCentre Party yena igama lakhe elokuzalwa elithiwa ngu Felix Dehwe uqhubekele phambili wathi ukuphumelela kwabaculi bako Bulawayo kuzenzakala kuphela nxa bengaqala ukusebenza ndawonye njengalokhu okwenziwa yilabo abasebenza besesigodlweni.
