Inengi alenelisanga ukuya emsebenzini ngoba bekungela mota ezithwala abantu zibasa edolobheni njalo abantu kade besesaba ukutholakala kusimo seziphithiphithi ezikuleli dolobho.
Isizatho kuyikuthi intengo yamafutha ezimota ikhweziwe, osekubangele lokuthi intengo yokugada umtshova ikhuphuke isuka kudola elilodwa isiya kumadola amathathu.
Umtshayeli womtshova, uMnu. Admire Mpofu uthi ngoMvulo abathwalangaabantu ngoba intengo yamafutha ezimota ikhuphukile okwethusayo.
“Namuhla lapha eNkulumane 12 abantu abathwali, the reason being i-fuel ikhweziwe abantu abajabuli ngendlela uhulumende ophathangayo abantu,kakhangeli izifiso zabantu. Ngokuzama ukwekela ukuthwala abadala lokwekela ukusebenza sizama ukuthi engxenye uhulumende angasizwa izikhalazo zethu”
UMnu. Nkosikhona Mlawuzi, osebenza njengomncedisi kamtshayeli katshova ababizwa ngokuthi ngowindi, uthi iholo labo lincane kakhulu.
Uthi loba bekhwezile intengo yokugada abantu abasagadi ngoba bathi labo iholo alikhuphukanga lokhe lifana njengakudala.
Isakhamuzi seNkulumane, uMnu. Kindman Ndlovu, uthi kenelisanga ukuya emsebenzini ngenxa yesimo esibi somnotho okwenza ukuthi angabi lemali yokugada umtshova.
“Lamuhla asenelisanga ukuya emsebenzini ngoba yeyi kuyayilahla lamuhla. Amakombi sekhwelile le fuel yakhona sikhwelile ngapho umholo awutshintshanga emsebenzini. So, lapha sekuyikucela ukuthi uhulumende engani uyabona eyehlise izinto lapha,izinto zihambe kuhle.”
UNkosikazi Nomusa Ndebele, umzali okhathezekileyo, uthe kubuhlungu ukuthi abantwana kabenelisi ukufunda ngemfaneli njalo bengungaqondanga ukuthi bahambe bodwa esikolo ngoba abantu bebetshisa amathaya bavimba lemigwaqo ngamatshe langezitina.
Inhlanganiso yeZimbabwe Congress of Trade Unions imanyane lenhlanganiso ezizimele zodwa bacela abantu ukuthi bakhalale umsebenzi okwamalanga amathathu.
