Inhlanganiso yeZimbabwe Lawyers for Human Rights isihambise emthethwandaba udaba lokuthunjwa kuka Retired Lieutenant Colonel Elliot Piki othunjwe ngabantu ngeSonto eHarare akade behlomile.
UPiki ubekhangelelwe ngoMvulo ukuthi ubezakhuluma kukhomishini ekhokhelwa nguMnu. Kgalema Motlanthe ehlolisisa okwenzakala ngoNcwabakazi lonyaka kuze kubulawe abantu abayisithupha libutho leZimbabwe.
Inhlanganiso le ibika ukuthi umkaPiki, uNkosikazi Sibongile Sarukato Piki, uthi uPiki wathunjwa njengalokhu okwenzakala kuMnu. Itai Dzamara owenhlanganiso yeOccupy Africa Unity Square owayefuna uMongameli Robert Mugabe atshiye umsebenzi.
UNkosikazi Sarukato Piki uthi abantu abathumba umkakhe babevale emehlweni ngamalembu njalo omunye wabo wadubula phansi wasefaka umbhobho wakhe embanjeni zika Piki esithi wenzelani ukukhanya engani usekela uMnu. Nelson Chamisa webandla leMovement for Democratic Change.
Kasenelisanga ukuxoxa legqwetha lakhe, uMnu. Jeremiah Bamu, amapholisa kanye loMnu. John Masuku wekhomishini ekhokhelwa nguMnu. Motlanthe.
UNkosikazi Sarukato Piki ufisa ukuthi kufakwe imibiko emaphephandaba lakumabonakude welizwe leZimbabwe kudingwe uPiki. Ufisa njalo ukuthi kusetshenziswe imitshana yakul’ezinsuku yokudingisisa lapho ahanjiswe khona ngokulonda umakhalekhukhwini wakhe.
