Ele Zimbabwe ngelinye lamazwe asethuthukisa ukufuya inhlanzi. Lokhu sekuze kwabangela ukusungulwa kwenhlanganiso yabafuyi benhlanzi eye Zimbabwe Fish Producers Association eHarare namhlanje.
Ingcitshi kwezokufuywa kwenhlanzi exwayisa ohulumende kumazwe e Africa kuloludaba uMnu. Blessing Mapfumo uthi kuyadanisa ukuba ele Zimbabwe lilizwe elilungele umsebenzi ofana lokufuywa kwenhlanzi kodwa liphila ngokuthenga inhlanzi emazweni angokhelwane.
Umqondisi kugatsha lukahulumende lwezifuyo lokulima uMnu. Bosman Makodza wazise lumhlangano ukuba ugatsha lwakhe soluzinikele ukusebenzelana labafuyi benhlanzi ukuze ilizwe lingalahlkelwa yimali kanje lona lilamadamu imfula lezifudlana ezilakho ukusetshenjiswa kulumsebenzi. Njalo abafuyi balakho ukuzigebhela amchibi wokufuya lezinhlanzi.
UDokotela Crispen Sukume ukhuthaze ukwehlisa imithelo yamanzi yinhlanganiso ye zinwa kubafuyi benhlanzi ngoba umsebenzi wabo ungavezi ukumotshakala kwamanzi njengeminye efana leyokuthelezela.
USukume ukhuthaza ukuba inhlanzi ezithengwe ngaphandle kwelizwe zifakelwe umthelo we 10cents enhlanzini ezilesisindo se kilogram elilodwa esithi lokhu kungaletha imali enengi engasetshenjiswa ukusekela imisebenzi yokufuywa kwenhlanzi kuleli.
Omunye wabafuyi benhlanzi, UMnu. Mapfumo uthi abantu abafuna ukufuya inhlanzi kabadinge ulwazi kulabo abalabo besungule bezimisele ukuze bephumelele:
Okwamanje inhlanganiso eye Lake Harvest yiyo enkulu efuya inhlanzi eziyisisindo esingama tone afika ku 8 000 ngomnyaka njalo igola inhlanzi ezilesisindo esingama tone angamatshumi amahlanu ngenyanga.
Linhlanganiso isebenzela emazweni afana le Malawi, Zambia, Mozambique njalo bakhangelele ukuqala e Tanzania kusikhatshana esilandelayo.
UMnu. Zokonia Kaitano ofuya ese Karoi uthi indubo ezibhekana labafuyi abasacathulayo njengaye yikudula kokudla kwenhlanzi ekhuthaza lumhlangano labalimi ukuba badinge indlela zokuzilungisela ukudla emapulazini abo kulokuyathenga sikhathi sonke.
Abezempilakahle bathi inhlanzi ziyakha umzimba njalo zitshiya ijwabu libutshelezi.
Kodwa ele Zimbabwe lokhe lisalela kudaba lokudla kwenhlanzi ngoba kuthiwa umuntu munye udla inhlanzi ezilesisindo senxenye nje ye kilogram ngomnyaka nxa siqathanisa lamazwe afana le Malawi le Zambia okudliwa inhlanzi eziyisisindo esifika ku 5 kilograms umuntu ngamunye ngomnyaka.
Inhanganiso yeZimbabwe Fish Producers Association izabamba umhlangano njalo ekupheleni kwawonalo umnyaka lapho okuzakhethwa iziphathamandla.
