Lanxa uhulumende esithi ukunikeza kwakhe amankampani ayisithupha amalayisensi okusungula imisakazo yamaTelevision kuveza ukuthi uzimisele ukuthukulula amagagasi lokugxilisa umbuso okhululekileyo, abanye bathi kababoni amankampani lawa ebika indaba ezisola uhulumende ngoba wonke alobudlelwano lebandla leZanu PF.
Amankampani la abalisa iRusununguko Media, yona ebikwa ingeyebutho, iAcacia Media eyelunga leZanu PF, uSharon Mugabe, iChannel Zimbabwe ekaMnu Happison Muchechetere yena owake wasebenzela umsakazo weZBC, iFairTalk Communication ebikwa layo ilobudlelwano lebutho lanxa nje abanikazi bekulandula lokhu kanye leJester Media eyephephandaba leDaily News.
Lanxa iphephandaba leli lisithi lizimele, kulesiphathamandla sebandla leZanu PF esibikwa silesabelo kulo.
Amankampani ancitshwe amalayisensi agoqela ekaMnu Trevor Ncube eyeAlpha Media Holdings yona edinda amaphendaba azimeleyo abalisa eleNews Day, eleStandard leleIndependent.
Inkampani yelunga leZanu PF uMnu Super Mandiwanzira, eyeAB Communications layo incitshiwe.
Ingcwethi kwezokusakaza uMnu Zenzele Ndebele utshele iStudio 7 ukuthi kusobala ukuthi amankampani ephiwe amalayisensi lawa asekela ibandla elibusayo.
Kodwa ilunga leZanu PF uMnu Believe Gaule ukulandule lokhu esithi abantu bahlezi bekhonona njalo nje lanxa uhulumende engaze enze okuhle.