EleZimbabwe litshiywe ngaphandle komhlangano oqoqwe ngele Melika osungulwe namuhla edolobheni leGaborone ozahluza isimo somvikela kuzwekazi leAfrica kodwa uhulumende weBotswana uthi uzinxusele uMnunzana Charles Shumba, olesikhundla se-defence attache kusigodlo seZimbabwe kulelolizwe, ukuthi abeyingxenye yalumhlangano.
Abaqoqi bomhlangano lo, bathi bona bathatha iziqondiso kunkokheli yeMelika phezu kokukuthi kunxuswa bani, kutshiywe bani kulomhlangano.
Umhlangano lo ozathatha insuku ezimbili, uqoqwe libutho leMelika elikhangela ngezomvikela Akuzwekazi leAfrica, eleU.S-Africa Command, kumbe AFRICOM ngamafitshane.
Umqondisi wabacuphi kunhlanganiso yeAFRICOM, uNkosikazi Rose Keravouri, utshele umsakazo weStudio7 ukuba bona balalela inkokheli yeMelika ukuthi kummele kunxuswe bani.
“Leso yisinqumo senkokheli yethu eMelika ukuthi kuzebani emhlanganweni. Ngenxa yezinye inhlelo ze Zimbabwe, uhlangothi lwethu lwe Security Council lubone kufanele ukuthi iZimbabwe inganxuswa. Kodwa lokhu akutsho ukuthi akula esingeke sakufunda kweleZimbabwe. ”
UMongameli Emmerson Mnangagwa, ngesikhathi ehlangana lomkhokheli wakwele Russia uMnu. Vladimir Putin ekuqaleni kwayonale inyanga, ukhonone kakhulu ngokuthi eleZimbabwe selivalelwe phandle kunhlelo zakwele Melika ezokuthuthukisa ezomvikela.
Uthe utshele uPutin ukuthi eleMelika liphathisa amazwe angomakhelwane afana leMalawi kanye leZambia, esikela eleZimbabwe eceleni. EleZambia selitshengise ukungathokozi phezu kamazwi ka Mnangagwa lamangala udaba lolu kunhlanganiso yeSADC leye African Union.
UNkosikazi Keravouri uyakuphika ukuthi eleZimbabwe selivalelwe phandle ngeleMelika kunhlelo zomvikela.
“Ngithanda ukuphikisa umbono wokuthi eleZimbabwe selitshiywe phandle. Njenge lizwe leMelika, sisebenzisana lamazwe afuna ukusebenza lathi. Uma sinxusiwe siyaphathisa amazwe asidingayo.”
Ihofisi yommeli weZimbabwe kwele Botswana ithi kayikwazi ukuthi kungani eleZimbabwe linganxuswanga, njalo mhlawumbe uhulumende weZimbabwe kazange akhalele ukunxuswa.
Ubudlwelwano phakathi kwele Zimbabwe leleMelika abunathisi amanzi ngemva kokuba inkokheli kaMongameli Joe Biden, yethese izijeziso zenotho kweyinye inkokheli yeZimbabwe, egoqela uMnangagwa.
Ocubungula ngezombusazwe, uMnumzana Effie Dlela Ncube, uthi akumangalisi ukuthi eleZimbabwe alinxuswanga kumhlangano wabakubutho oyenzelwa eGaborone.
“Ubudlwelano phakathi kweZimbabwe leMelika buhlangahlangane. IMelika isuka khatshana iphathisa eleZimbabwe ngezengqubela phambili. Lokhu esikubona la amalanga kukhulunywa ngobudlelwano oluphathelene lezomvikela, kuzabanga ukudonselana. Kodwa ithemba yikuthi kuzaba lokukhumisana umlotha phakathi kwamazwe womabili.”
EleMelika linxuse amazwe angamatshumi amathathu lambili ukuzangena kumhlangano wona ophela ngoLwesithathu.
Esinye isiphathamandla kubutho leAFRICOM sitshele iStudio 7 ukuba eleMelika alijabulelanga indlela ukhetho lweZimbabwe olwaqhutshwa ngayo nyakenye, lokunye okufana lokutshaphaza amalungelo oluntu.
UMongameli Mokgweetsi Masisi wakwele Botswana, nguye ovule umhlangano lo ngokusemthethweni, egcizelela ukuthi kulwiswe ukuhluthunwa kwentambo zombuso khona osekubhahile kuzwekazi leAfrica.
“Kumele sizame ukulungisa isimo esikhulela phambili sokuhluthuna umbuso okungekho emthethweni ngabebutho. Lokhu kubuyisela emuva ukuthula kuzwekazi leAfrica."
Kukanti umaqhuzu wenhlanganiso yeAFRICOM, uMnumzana Michael Langley ukhuthaze eleAfrica ukuthi libambane ukuze lenelise ukunqoba ukungahlaliseki ikakhulu kwezombusazwe. “Ngesikhathi silwisana lokungahlaliseki esibhekane lakho, ndawonye sizaphuma lendlela yokuyaphambili, ngoba eleAfrica likhangelane lendubo ezitshiyeneyo kwezomvikela."
Umhlangano lo uqhutshwa ngesikhathi kulokukhathazeka ngokungahlaliseki kwezombusazwe ikakhulu ngentshonalanga yezwekazi leAfrica lapho abalwa becatsha bengaphansi kwenhlanganiso ze Al-qaeda le-Islamist State, kuyibo abagconwa ngokulwa lokufuthelana okukhona.
Forum