Kube lokuxokozela emhlanganweni wabalwa impi yenkululeko kulandela insolo abayenze omunye umkhokheli wabo, uMnu. Section Ncube abathi kakhethwanga okusemthethweni okubangele ukuthi omunye umkhokheli wabo, uMnu. Victor Matemadanda, oze evela abakhuze esithi baziphatha njengengabantwana.
Ukuxokozela lokhu kuqhamuke lapho lumhlangano uqala abanye besithi utshalimana wabalwa impi yenkululeko eZansi yemaNdebeleni uMnu Section Ncube kakhethwanga okusemthethweni.
Lokhu kudale ukuthi umsekeli kamqondisi wenhlelo zebandla leZanu PF uMnu. Headman Moyo angenele abhule umlilo.
Ukuxokozela okubekhona akumhambanga kahle uMatematanda obesidla amalahle esithi abalwa impi yenkululeko laba baziphatha njengabantwana.
Esethula amazwi akhe uMatemadanda uthe ibandla leZanu PF lilokukhathazeka ngodlame olubonakale ebandleni eliphikisayo eleMDC T esithi uNkosazana Thokozani Khuphe uyancindezelwa.
Uphinde wathi kuyadingakala ukuthi iholo labo liyengezwe kodwa wathi okwakathesi akula mali ngoba ihuquluzwe ngamalunga awe G40 abalisa uJohnathan Moyo, uSaviour Kasukuwere kanye loPatrick Zhuwawo.
UMatematanda uchothoze owayenguMongamelu, uMnu.Robert Mugabe esithi wabusa ngokwehlukanisa abantu.
UMatematanda uthi abalwa impi yenkululeko kumele basukumele phezulu ekukhankaseleni ibandla leZanu PF ukuze ilizwe lingabiselwa embusweni wamakhiwa.
UMatematanda uthi okwakathesi labo abazatholakala betshaya abantu bazajeziswa ngoba uMongameli Emmerson Mnangagwa efuna ukhetho olungela ladlakela.
UMnumzana Edson Mbedzi osebenzela ugatsha olubona ngenhlalakahle yabalweli bempi yenkululeko uthi uhulumende uzabhalisa kakutsha labo abalwa impi ukuze labo abangatholanga imali ngesikhathi kuphiwa abanye bayiphiwe.
Abalweli benkululeko laba bathenjiswe imisebenzi njalo bakhuthazwa ukuba bangene labo kukhetho.
