Idolobho le Marondera ngoLweisibili lihlaselwe ludlakela oluqhamuke ekutshengiseleni okwenzakale kabili okutshiye abantu abamblawa belimele.
Ukutshengisela kwakuqala bekukhokhelwa ngabalwa impi yenkululeko besithi umgcinisihlalo webandla leZanu PF esigabeni seMashonaland East, uMnu. Ray Kaukonde kumele axotshwe ebandleni. uKaukonde ubethwe nguNkosikazi Grace Mugabe njengomunye wabantu abangathembekanga njalo abafuna ukubhidliza ibandla leZanu PF.
Ngemva kamazwi kaNkosikazi Mugabe inkokheli yesigaba inqume ukuba axotshwe kodwa ngeviki edluleyo enye njalo inkokheli yabandla ithe uKaukonde kumele angasuki.
Abatshengiselayo laba bebekhokhelwa ngabathi ngabalwa impi yenkululeko behlabela ingoma zokusola uKaukonde phandle kwamahofisi abo kwaze kwabuya ilunga ledale lepolitburo, uMnu. Sydney Sekeramayi ozame ukubachasisela indlela eqondileyo abangayenza ukuthi axotshwe uKaukonde kodwa bamhoze waze wazithulela.
Ukutshengisela kwesibili bekuphezu kokusola amapholisa abikwa etshaye umtshayeli wekhombi waze wafa ngoba engawafumbathisanga i$10 akade beyifuna.
Amapholisa amathathu abikwa ebotshiwe phezu kodaba lolu. Ukutshengisela lokhu kube lodlakela olubangele ukuthi amapholisa asebenzise intuthu ehitshayo kwalimala abantu abambalwa.
Ukuxokozela kubandla leZanu PF kuqhubekela phambili kulandela imbiko yabanye abalwa impi yenkululeko abathi umkhokheli wabo, uMnu. Jabulani Sibanda kaxotshwanga ngabazithi ngabohlangothi lwe Council of Elders. UChris Gande weStudio Seven uxoxe lowalwa impi yenkululeko, uMnu Max Mkandla.
