Sokuqhamuke impi yamazwi phakathi kwesikhulumeli sikaMongameli Mugabe, uMnu George Charamba lomphathintambo wemfundo yaphezulu uMnu Jonathan Moyo.
Ababili laba baphoselana aqatha phezu kodaba lokulwisana kubandla leZanu PF phakathi kwecele elikhokhelwa nguMnu Emmerson Mnangagwa lelinye elizibiza ngokuthi yiG40.
Ekhuluma emsakazweni weZiFM ngoLwesine, uCharamba uchothoze uMoyo esithi uyisiwula esicabanga ukuthi silakho ukususa uMugabe embusweni kumbe ukuthatha intambo nxa ethe wasuka esihlalweni.
Lanxa engamqambanga ngegama, uCharamba uthe uMnu Moyo usebenza lamanye amalunga eZanu PF njalo basekela uNkosikazi Joyce Mujuru.
Ephendula enkundleni yebulenjini, iTwitter, uMoyo uthe uMnu Charamba nguye isiwula esisebenza lecele likaMnangagwa.
Wengeze wathi uCharamba yisisebenzi sikahulumende esingamelanga singenele kumbango wezikhundla kuZanu PF.
Ingcwethi kwezombusazwe uMnu Nkululeko Sibanda utshele iStudio 7 ukuthi ukuthethisana kukaMoyo loCharamba kuveza sobala ukuthi into kazimanga kuhle kuZanu PF.
