Uhulumende weZimbabwe uthi uzaqhubeka ephathisa iziphepheli eziselizweni leli ukuba zibe lempilo ehlelekileyo. Wethule lokhu ngesikhathi emanyene lamazwe omhlaba ukunanza ilanga leziphepheli ele World Refugees Day.
Lanxa iziphepheli eziseTongogara Refugee Camp eseChipinge esabelweni seManicaland, zincoma ezikwenzelwe nguhulumende, zithi kunengi okunye okufanele akufeze.
EleZimbabwe ngelinye lamazwe omhlaba awakhetha ukulandela iziqondiso zomthetho wokulondoloza impilo yeziphepheli, oweInternatinal Refugee Day. Kuleziphepheli ezingafika inkulungwane ezingamatshumi amabili lantathu eZimbabwe, njalo ezifika phose inkulungwane ezilutshumi lasithupha, ziseTongogara Refugee Camp.
Kuziphepheli lezi, inengi lidabuka kwele Democratic Republic of Congo. Abanye bavela eMozambique, Burundi, laseRwanda.
IStudio 7 ikhulume lesinye isiphepheli esihlala kule inkamba, uNkosikazi Naomi Mbuyi, okhonone ngokungaphathwa kuhle ngezinye iziphepheli ngoba engumfelwakazi.
Esinye njalo isiphepheli esikhulume leStudio 7 eTongogara, nguEvidence Hakizimana Havyarimana, yena owazalelwa wakhulela kuleli, njalo olenhlanganiso encedisa abanye abasakhulayo.
Ekhuluma emkhosini wanamuhla wokuthakazelela iziphepheli oqhutshelwe eTongogara Refugee Camp, umsekeli kamphathintambo obona ngezisebenzi zikahulumende kanye lokuhlala kuhle kukazulu uNkosikazi Mercy Bimha, uthe lanxa kulukhuni kwezomnotho, uhulumende uzaqhubeka ngokusiza iziphepheli.
Uhulumende uphathisana lenhlanganiso ezibalisa eyeWorld Food Programme leyeUnited Nations High Commissioner for Refugees, kanye lamazwe agoqela eleCanada, leleMelika ukugcina iziphepheli ezise Tongogara.
Okhokhela inhlelo eziqhutshwa yinkampani yeTongogara, uMnu. Johannes Mhlanga, ubonge usizo lukahulumende, njalo wazisa ukuba kusukela kumaviki edluleyo, uhulumende wenelisile ukuncedisa iziphepheli ukuthi zithole ingwalo zokuhambisa ezama passports.
UMnu. Brinarian Masango, umlimisi osebenza lenhlanganiso yeWorld Vision, esebenza leziphepheli zaseTongogara, ukhulume leStudio 7 phezu kohlelo lokulima kuthelezelwa, oluqhutshwa yiziphepheli lezi.
Ngaphandle kokulima, iziphepheli ezihlala eTongogara Refugee Camp zilemisebenzi ebalisa ukweluka, ukuthunga, ukufuya imbuzi lengulube, njalo, bakhona abalezitolo zokuthengisa impahla lokudla.
Kulabanye abathi iziphepheli zilakho ukwengeza isikhwama sikahulumende esemali, njengoba labo befuna ukuhlala impilo ehlelekileyo.
Ingcwethi ecubungula ezombusazwe njalo efundisa ekolitshini leNational University of Science and Technology, uMnu. Methuseli Moyo, uthi kuqakathekile ukunceda iziphepheli.
Ilanga leWorld Refugee Day belithakazelelwa phansi kwendikimba yokuphathisa iziphepheli, eyeSolidarity With Refugees ngesikhiwa.
Forum