Abenhlanganiso eyeNational Aids Council (NAC) bathi inani labantu abatholiswa imithi yabaphila lengculaza eyama ARVs seliqansile bekhuthaza uzulu ukuzilondoloza ukuze avikele ukumemetheka kwegcikwane ele HIV/AIDS.
INAC ithi umkhuhlane we COVID-19 kumele unikeze uzulu ithuba lokuba azivikele kumagcikwane womabili. Lokhu kuphume emkhosini wokunanza usuka lwabantu abaphila ngomkhuhlane we HIV/AIDS.
Imbongi uLimuel Tshuma omunye wabakade belibazisa uzulu emkhosini wokunanza usuku olwe World AIDS Day, owenzelwe eHarare namhlanje, lapho ele Zimbabwe limanyane lamanye amazwe womhlaba ukunanza usuku lolu phansi kwe ndikimba ethi ‘Global Solidarity, Share Responsibility’.
Ekhuluma kulumkhosi umholi we NAC uMnu Benard Madzima uthe loba nje kusasekunengi okumele ele Zimbabwe likwenze ukuze uzulu avikeleke kugcikwane leHIV/Aids, okujabulisayo yikuthi okwakhathesi sebebanengi abaphila laleli gcikwane abaphumela egcekeni bengesabeli khatshana ukudinga usizo lokuphiwa amaphilisi ama ARV’s.
UMadzima uqonqosele uzulu ukuba angayekethisi ukuzivikela kuHIV/AIDS ngesikhathi se Covid/19 esithi kuqakathekile ukuzivikela emkhuhlaneni yonke nje.
“Ebantwini abafika i1.3 million abalomkhuhlane we AIDS, abangu 1.2 balemithi. Inani labantu abalomkhuhlane lo liqhubeka lisehla. Kusuka ngo 2016 kusiya ku 2017 inani labantu abalalumkhuhlane selehlile”
Uqhubeke esithi ilanga le World AIDS Day liyisikhathi sokuba inhlanganiso zonke zibambisane ekudingeni imali yokuthola imithi lendlela zokufundisa lokulimukisa uzulu ngalumkhuhlane.
“Ilanga leli likhulu kakhulu ekulwisaneni lomkhuhlane we AIDS. Njenge NAC siyaziqhaja ukuba silinxusile kuleli langa, esandise ukulinanza kulabantu abanengi”
Obemela umphathintambo wezempilakahle emkhosini lo uMnu Ignatious Mangure uthe kungumlandu kazulu wonke ukulwisana lawo.
“Sizayi ukuba kulendingezo yokuba kumele sifake indlela zokulwisana lomkhuhlane we HIV/AIDS ukuze kube labantu abalutshwane abalomkhuhlane lo ngo 2030. Siyazi ukuba sifuna abantu abaziphilileyo ukuze sibe lokuphumelela”
Imbongi elodubo uAlbert Nyathi laye ube esemkhosini walonyaka, esithi ingoma, inkondlo lamabhuku ngezinye indlela ezingasetshenziswa ukulwisana lalu mkhuhlane.
“Imidlalo le esiyenzayo yenza kuhle kakhulu ekulwisaneni lomkhuhlane we AIDS. Imidlalo le yiyo ekhuluma labantu ibatshela ukuba lokhu kayisikho lokhu yikho akwenziwe kanje akwenziwe kanje”
Ingcitshi zezempilakahle ezehlukeneyo ezikhulume kulumbuthano zincome kakhulu umsebenzi owenziwa nguhulumende lenhlanganiso ezizimelyo ekulwisaneni lomkhuhlane we HIV/AIDS, ngalanga lanmhlanje lika 1 Mpalakazi elabekwa eceleni ngabenhlanganiso yomanyano wamazwe womhlaba ukunanza lokuqakathekiswa komsebenzi wokulwisana lokuthelelanwa kwaleli gcikwane kanye lokunakekelwa kwalabo abaphila lalo, kusukela ngomnyaka ka 1988.
