Amazwe emhlabeni wonke jikelele ananze usuku lwe International Day of the Girl Child ngoLwesihlanu, inhlanganiso yeUnited Nations Children’s Fund (UNICEF) isithi amazwe amanengi ephula ilungelo lamantombazane.
I-UNICEF, ethule umbiko lo ekhasili layo ku-Internet, ithi amazwe amanengi kawananzi amalungelo amantombazane. Ithi abanengi bendiswa bebancane njalo bayazithwala mahlayana ngenxa yokubanjwa ngamandla ngabesilisa.
I-UNICEF iphinde yathi phakathi kwamantombazane amane, eyodwa iyadlwengulwa kumbe yendiswa ngenkani. Ithi okukhathazayo njalo yikuthi banengi ababanjwa ligciwane leHIV emhlabeni wonke jikelele.
Ithi ezifundweni lakho kuyasilela kube labanye abafuba ngenxa yokuswela ukudla okwakha umzimba. Sixoxe ngezinye inhlupho ezibhekane lamantombazana loNkosazana Nomagugu Tshili ohlala eVictoria Falls othi inengi labo lithwele nzima uma lisesikhathini.
“Abantu abanengi basebenzisa amalembu, kuyabangela i cancer lokusubuka nhaphansi laborash abangaqedakaliyo ngaphansi.”
Abasebenza kunhlanganiso ezinceda amantombazane bathi ayadubeka amantombazane, ikakhulu emaphandleni.
UMnumzana Trymore Ndolo okunhlanganiso yePathways Women Empowerment and Girl Child Support Network uthi abanye babo kabafundi ngemfanelo.
“Abantwana abangamankazana nxa besesikhathini kabayi esikolo, njalo kwande abendiswa bebancane thina njengenhlangaso siyazama ukubafundisa ngamalungelo abo ikakhulu kwezokuthomba lezocansi njalo lobuyanga buyandisa uhlupho lolu.”
Sixoxe njalo loMnumzana Mishek Ngulube owenhlanganiso yeMhambi Children’s Fountain of Hope.
“Lathi lapha esikhona njengenhlanganiso silenhlupho ezinje ukuthi abantwana besikolo kabafundi ngokuswela kwabazali, abanye bacina besiyagcinwa yizihlobo umntwana engadli ngemfanelo ecine njalo engadafundi.”
Umzali uMnumzana Telephone Sibanda, umhlali weVictoria Falls, uthi ilanga leli loba belinanza minyaka yonke, kunengi okusilelayo ekukhuliseni amantombazane.
“Ukukhulisa umntwana oyinkazana kunzima kakhulu laba abakubo grade 7 kusiyaphezulu ngoba ulento ezinengi eziyabe sezidinga ukuthi umthengele zona, kodwa kasilamali nge Zimbabwe yethu le.”
Uphenyo olwenziwa ngabohlangothi lukahulumende olwemfundo ephansi, lwaveza ukuba ngomnyaka ka2023, abafundi abedlula inkulungwane ezine lengxenye – 4,557 bazithwala, inengi labo lingabafundi bemaphandleni.
Ngalokhu, abeUNICEF, bathi sekuyisikhathi ukuba amazwe abambane ekuxhaseni umntwana oyinkazana. Indikimba yalonyala ekunanzweni kwelanga leli ithi ‘Girls’ vision for the future’.
Forum