Amazwe omhlaba amanyene ekunanzeni usuku lweWorld Children’s Day ngoMgqibelo abanye besithi ikusasa labantwana beZimbabwe libuvilibana.
Bathi ukubhidlika komnotho, ezemfundo kanye lokuswelakala kwemisebenzi osokuleminyaka kugxila elizweni kutshabalalisa amathuba abantwana okuphumelela empilweni.
Izakhamizi zikaWard 2, eWilikisa, esigabeni seMatshetsheni, zona zikhala ngokuswelakala kwesikolo semfundo yaphezulu, eye-secondary, okubangela ukuthi abanye abafundi baphelele kuGrade 7, ngokubika kwentathelizindaba yeStudio 7 uAlbert Ncube.
Kusenjalo, uMongameli Emmerson Mnangagwa wethekelele kweleBotswana ngoMgqibelo emini ukuyaphatheka emkhosini wokunanza usuku lweWorld Children’s Day.
Ubambane losowabo walelolizwe, oweNamibia kanye lowaseZambia emkhosini owenzelwa ebholohweni elikhulu elixhumanisa amazwe womathathu eleKazungula.
Ugatsha lweUnited Nations olubona ngezabantwana, olweUnicef, lalo luphatheke kulumkhosi.
Ohlaziya ezombusazwe, uMnu Effie Dlela Ncube, utshele lumsakazo ukuthi uhulumende kaMnangagwa kumele aqakathekise ikusasa labantwana ngokulwisana lenkohlakalo lokutshala imali enengi kugatsha lwezemfundo.
Uhulumende yena uthi wenza konke akwenelisayo ukuthuthukisa abantwana.