Umanyano weSouthern African Development Community (SADC) ukhangelelwe ukuba uzakwenza umhlangano omkhulu eHarare ozahlaziya udlakela olwenzakala kweleMozambique lokhetho olusanda kuqhutshwa kweleBotswana lakwamanye amazwe.
Umhlangano lo uqhutshwa ngesikhathi kulodlakela olumangalisayo kweleMozambique kulandela ukhetho okunqobe uMnu. Daniel Chapo webandla leFrelimo kukhetho lukamongameli.
Abaphikisayo bathi ibandla leFrelimo labambisana leleZanu PF ekuqilibezeleni kukhetho lolu.
EleZimbabwe letheswa umlandu njalo wokungenela kukhetho lwakwelebotswana lamanye amazwe.
Uhulumende kaMongameli Emmerson Mnangagwa uyakuphika lokhu.
Ukuze sihlaziye udaba lolu, sixoxe loMnu. Effie Dlela Ncube olwela ilungelo loluntu ekunhlanganiso yeNational Consumer Rights Association othi kumele inkokheli yeSADC ilalele izikhalazo zikazulu hatshi ukuba ngamahlongandlebe.
Kuzaphumani emhlanganweni lo njengoba uMnangagwa kuthiwa wangenela kukhetho olwaqhutshwa emazweni la?
Sixoxe ngodaba lolu loMnu. Nhlanhla Moses Ncube umnginicihlalo wenhlanganiso yeFreedom Alliance, loMnu. Joseph Tshuma omele iPelandaba-Tshabalala kudale lephalamende ekubandla leZanu PF.
UTshuma usungula uthi kuqondile okwenziwa yiSADC njalo loMnangagwa okuthiwa ungenela kakhulu kukhetho emazweni akumanyano lo.
UNcube uthi umhlangano ozayo kawusoze uphume lokubambekayo ngoba kuzabe kuhlangene abantu abazimbila zantabanye.
Forum