UNkosikazi Grace Mugabe uthi kulilungelo lakhe njengesizalwane seZimbabwe ukuba nguMongameli welizwe nxa efuna.
Uthi labo abamsolayo besithi ufuna isikhundla lesi bacabanga ukuthi yibo bodwa abalelungelo lokukhokhela ilizwe, okungumcabango athi awuqondanga.
UNkosikazi Mugabe wethule amazwi la ekhuluma emhlanganweni awenze lababengabalweli bempi yenkululeko eMazowe ngoLwesine.
Ingcwethi kwezombusazwe zithi amazwi la aveza mgceke ukuthi uNkosikazi Mugabe ulesifiso sokuthatha intambo zombuso lapho umkakhe uMongameli Mugabe esetshiya lesisikhundla.
Uqhubeke esola uNKosikazi Joyce Mujuru esithi ungumuntu ongethembekanga njalo ojonge ukugenqula uMugabe embusweni.
Ngalokho, uNkosikazi Mugabe uthe uMujuru kumele atshiye isikhundla. Lanxa emihlanganweni yakhe edluleyo ubegudla iguma, eMazowe umbethe ngegama uMujuru.
UNkosikazi Mugabe uncome uMnu Emmerson Mnangagwa esithi ungumkhokheli olohlonzi, okuyinto ingcwethi ezithi iveza sobala ukuthi usekela uhlangothi lukaMugabe.
Ukuhlaziya loludaba sixhume ingcwethi kwezombusazwe uMnu George Mkhwanazi.
