Icele leMDC elikhokhelwa nguMnu Morgan Tsvangirai lithi kulabasekeli balo abalaliswe ku Intensive Care Unit kwesinye isibhedlela eHarare kulandela ukutshaywa kwabo ngabasekeli beZanu PF ngoMgqibelo.
UMnu Barnabas Mwanaka loMnu Williamn Mukuwari balimele kakubi ekuhlaselweni kwabo ngabeZanu PF.
UMwanaka utshaywe ngoMgqibelo esehofisini yeMDC-T eMbare lapho abasekeli beZanu PF ababikwa behlasele babhuqa besabhuqa abantu. UMukuwari yena ubikwa edutshulwe ngamasotsha eseBudiriro.
Kusenjalo abasekeli beMDC-T abalitshumi lathoba munwe munye ababotshwe eMbare ngoMgqibelo bakhululwe ngoLwesibili ngemva kokuhlawuliswa amadola angamatshumi amahlanu ngamunye.
Abasekeli beMDC-T laba babikwa beye enkambeni yamapholisa ukuyamangalela abasekeli beZanu PF ngokubatshaya abakade bebenze khona kodwa bafika ke sebebotshwa lanxa nje bebengomamangala.
Umsekeli wesikhulumeli seMDC kaTsvangirai uNkosazana Thabitha Khumalo utshele uNtungamili Nkomo weStudio 7 ukuthi uyakusola kakhulu ukuhlukuluzwa kwabasekeli bebandla lakhe ngabeZanu PF.
