Kulezizalwane zakwele South Africa ezifuna ukuthi kuxotshwe bonke abantu bokuza abangelamaphepha aqondileyo okuhlala kulelolizwe kusukela mhla zimbili kuMpandula.
Abantu laba abakumabandla aphikisa elibusayo, ezinye izisebenzi ezidabuka kwele South Africa labangela misebenzi bathi bazavimba imigwaqo yonke bangene emafekithali lapho abazabe bexotshwa abantu bokuza abangelamaphepha aqondileyo okusebenza kulelolizwe.
Kubikwa ukuthi okwamanje sebehlukuluza abadabuka kwamanye amazwe abatshayela izimota ezinkulu ezithwala impahla esetshenziswa emazweni atshiyeneyo.
Uhulumende kaMongameli Cyril Ramaphosa uthi kazi lutho ngokufunwa ngabantu laba. Omunye walabo abaqhuba lokhu ongafisanga ukuthi siveze igama lakhe uthi sebebikele uhulumende ngabazakwenza ngeviki ezayo.
Uthi abakufunayo yikuthi uhulumende kaRamaphosa alungise okuhlupha abantu abadinga imisebenzi labasebenzayo asebethola iholo eliphansi njengoba abantu bokuza bevuma ukuholiswa imali ephansi ngabaqhatshi.
Ukuze sihlaziye udaba lolu, sixoxe loMnu. Nqabutho Mabhena, umgcinisihlalo wenhlanganiso emele abantu abadabuka eZimbabwe abahlala kwele South Africa.
