Inkokheli zezigaba ezehlukeneyo ezibumba inhlanganiso elawula umdlalo wenguqu elizweni eyeZimbabwe Football Association, kusasa ziyabe zithe gwaqa eHarare zihlaziya ukuba kuyini okumele kwenzakale phambilini kokhetho lokudinga inkokheli entsha yalinhlanganiso ekuqaleni komnyaka ozayo.
Kukhangelelwe ukuba inkokheli lezi, ezaziwa ngokuthi ngamakhansila, ziguqule isisekelo sombuso weZIFA kulungiselelwa ukuqhutshwa kokhetho. Kubikwa okunye abafuna ukukuphosela kusisekelo yikuba labo abafuna ukuba ngabomongameli benhlanganiso yeZifa kube ngabantu abaphumelela kuzifundo zabo zeOrdinary Level, okuyinto esidale ukufuthelana okuthile kwabanye. Intathelizindaba yezemidlalo uAndrew Tambanewako uthi uvumelana lakho lokhu ngoba umongameli weZifa kungumuntu ozabe emela ilizwe.
"Ilula lindaba ngoba khathesi sesiphila sindawonye lamanye amazwe. Umkhokheli lowu owenhlanganiso yeZifa uyabe engasebenzeli elizweni kuphela kodwa kuyabe kumele aphume ayemela ilizwe kwamanya amazwe. Akungeke kulunge nxa engakwazi ukukhuluma isilungu loba engafundanga. Ngalokho mina ngiyalusekela lelo nyathelo," kutsho uTambanewako.
Owaqeqetshwa yinhlanganiso yeFIFA, wasebenzela njalo inhlanganiso le, uBrian Moyo, uthi kulenkungu egombolozele loludaba lokupasa amaO Levels osekungenza kubekhona abavalelwa phandle khona kungamelanga.
"Kulabanye abantu abalolwazi olomdlalo wenguqu olulesisindo okwedlula ukuba lama O Level amahlanu. Ngitsho abantu abafana lalabo ababe ngokaputeni beqembu lesizwe okweminyaka elitshumi. Kube sekuthiwa kabafanelanga ukukhokhela inhlanganiso yeZifa. Khona futhi vele isikhiwa kasikhulunywa okuyangaphi phandle le kumuli yeFIFA," kutsho uMoyo.
Umlandeli womdlalo wenguqu ohlala kweleIreland, uMichael Maseko, laye uthi ukukhokhela umdlalo wenguqu akudingi isikolo.
"Mina angikuboni kulungile ukuba kuthiwe umdlalo wenguqu usuphathwa ngabantu abale 5 O Levels ngoba inengi labadlali benguqu kalifundanga. Kuyabe sekusitsho ukuba abadlali sebevalelwa phandle njalo mina bengifisa ukuba ololwazi lumdlalo avunyelwe aphathe," kutsho uMaseko.
Owake waba yisiphathamandla senhlanganiso yeZifa kuhlangothi lwabasakhulayo, uMkhululi Mthunzi, uxwayise amakhansila ukuba anxwanele ukungacobodisi umdlalo wenguqu elizweni.
"Esingathi ngamakhansila yibo abakhetha ubukhokheli obasingenisa edakeni, abaqalisi. Sikwenzile ngo2010, sakwenza ngo2014 kanye lango 2018. Uhlupho yikuthi esikhathini sokuthi abantu bakhangele umuntu olengqondo zebhola bona bakhangela isikhwama sakhe ukuba uzenelisa yini ukuvala owengwenya. Lokho kusenza sibuyele emuva kakhulu, kube angani kasifundi," kuphawula uMthunzi.
Kasenelisanga ukukhuluma lamakhansila eZIFA ngoba bathe udaba lolu soludale ukuxokozela okumangalisayo kunhlanganiso le. Bambalwa asebesazakala ukuba bafuna ukukhokhela inhlanganiso yeZifa yona ephethwe yiNormalisation Committee ngemva kokumiswa umsebenzi okwenziwa ubukhokheli bukaFelton Kamambo.
Laba ngabagoqela uProphet Walter Magaya yena obikwa eseqalile ukukhankasa njalo ensukwini ezedluleyo ubesedolobheni lakoBulawayo lapho aqhube khona umhlangano lenkokheli zakulesisosigaba.
Abasiki bebunda bathi kulumhlangano kube lenkuthazo eyokuba kulahlwe isinqumo esokuba abafuna ukuba ngomongameli kube ngabantu abapasa iOrdinary Level.
Lomdlali olodumo uPeter Ndlovu laye elakhe igama lixubaniswa lelalabo abafuna ukuba ngabakhokheli beZifa kodwa yena akakaphumeli egcekeni.
Forum