Inkokheli yesabelo seNorth West kweleSouth Africa ithi kulezizalwane zeZimbabwe ezedlula amakhulu amathathu ezibotshwe kusukela ngoNcwabakazi lonyaka ezazisemba amatshe aligugu okungekho emthethweni.
Abanye babo babikwa beyingxenye yabavalelwe emgodini weStilfontein abacatshangelwa ukuba yizigebengu ezingafuni ukuphuma emgodini ogonjolozelwe ngamapholisa.
Umbiko owethulwe nguhulumende wesabelo lesi ngoMvulo ebusuku ukhombisa ukuthi phakathi kwabotsheketsha abedlula inkulungwane lamakhulu amabili – 1,259 ababotshwe kulesi sabelo enyangeni ezine ezedluleyo, izizalwane zeMozambique zedlula amakhulu ayisitshiyagalombili - 871 kulandele ezeZimbabwe ezedlula amakhulu amathathu - 343.
Udaba lolu selulethe ukukhathazeka kuzizalwane zeZimbabwe kweleSouth Africa ezithi lokhu kungabe kuyibufakazi bokuthi banengi abeZimbabwe abayingxenye yabotsheketsha abaphansi komgodi owawungowegolide eStilfontein esabelweni lesi.
Izakhamizi zelokitshini leKhuma eNorth West zitshele iStudio 7 ukuthi kulemuli yeZimbabwe elabantwana abane abavaleleke kulo umgodi osekuphele inyanga amapholisa esala ukuthi kungene ukudla lamanzi esithi lokhu kuzenza baphume. Omele eleZimbabwe kweleSouth uAmbassador David Hamadziripi utshele iStudio 7 ukuba usethume abantu ukuba beyedingisisa ukuthi kulezizalwane zeZimbabwe ezingaki emgodini weStilfontein.
Esinye isizalwane seZimbabwe uNkosikazi Linah Minyizeya yena ubehlengezela inyembezi ngesikhathi ekhuluma ngabantwanabakhe ababili abakulo umgodi.
“Ndiva kabuhlungu ngabantwana bami. Ngicine ngoFebruary ukuzwa ivoice yabo kungathi batshela umuntu ukuthi hambe kuthi kumama wethu sikhona ngapha phansi, Ngizwa kabuhlungu kakhulu.”
Osakhulayo oweZimbabwe uGeorge Dube yena ongakufihliyo ukuthi laye uyangena kule imigodi ngenxa yobunzima bempilo, uthi indlala ayilankosi.
“Akulamali eZimbabwe yikho izizalwane zeZimbabwe zisiza lapha zizoziphandela. Akekho okubamba ngamandla ukuzala kodwa inhlupheko lendlala yikho okusifuqayo.”
Izizalwane zeSouth Africa sezethule ukukhathazeka okukhulu ngemva kokuthi uhulumende ethe ulokhu esadinga icebo lokuhlenga otsheketsha abasemgodini lo. UNkosazana Thandeka Zinzi Tom uthi ukhathazeke kakhulu ngomfowabo uAyanda osemgodinilo.
“Ndingathi mina abanabuntu. Kuthiwa umuntu ngumuntu ngabantu kodwa kubonakala bengelabuntu. The only thing abaconcerned ngabo zistatus zabo. They don’t care ngempilo yabantu.”
Okhokhela umphakathi weStilfontein kuloludaba uMnumnzana Johannes Qankase uthi siyesabisa isihluku esenziwa nguhulumende kubotshaketsha laba.
wisa kabuhlungu kakhulu ngokuba thina ekuqaleni sike saya siyicommunity sithi sifuna ukunceda. And uncedo lwethu lubonakele ngoba sikwazile ukusindisa abantu abayi 11 kwaba nomzimba esiwukhuphileyo sisebenza lamavolunteer aphuma khonapha ekuhlaleni besebenza ngezandla zabo kungela machine bengabhadalwa ngumuntu. Kodwa siva kabuhlungu ukuthi kufikela kuleli xhesha ngoku akukho namuntu oseke wasevwa yigovernment.”
Kusenjalo, amaqwetha alwela ilungelo loluntu kweleSouth Africa athi azakuyafaka esinye isicelo emthethwandaba sokuthi abaphansi emgodini laba baphiwe ukudla lamanzi ngesikhathi uhulumende esadinga icebo lokubahlenga.
Forum