Abezindaba abeNewzroom babika ukuba sokulabantu abedlula kancane ikhulu lamatshumi ayisithupha – 166 asebehlengwe emgodini weStilfontein abahlale khona isikhathi eside besesaba ukuphuma ngoba bebegonjolozelwe ngamapholisa.
Abezindaba laba batshelwe yisikhulumeli samapholisa uBrigadier Athlenda Mathe ukuba inkampani ezimeleyo eyeRescue Security Services isikhuphe lezidumbu ezifika phose amatshumi ayisitshiyangalombili – 78 emgodini lo lapho ababencitshwa amanzi lokudla.
Izihlobo labamele inhlanganiso ezizimeleyo sebemangalele uhulumende emthethwandaba besithi wehluleka ukunceda abantu laba kuseselesikhathi.
Kukhanya inengi labotsheketsha laba abemba igolide badabuka eZimbabwe leMozambique. Omele iZimbabwe kweleSouth Africa uAmbassador David Hamadziripi uthi sebethume abantu ukuba beyehlolisisa udaba lolu eStilfontein esabelweni seNorth West.
Ukuhlaziye iStudio 7 ixoxe loMnu. Ngqabutho Mabhena owenhlanganiso yeZimbabwe Community in South Africa othi kucatshangelwa ukuthi banengi abadabuka eZimbabwe abasemgodini lo njalo lasebedlule emhlabeni.
Forum