Abalandeli bomanyano wamabandla aphikisayo oweMovement for Democratic (MDC) Alliance ababotshwe betshengisela ngoLwesithathu ngeviki ephelileyo ngesikhathi abantu belinde impumela yokhetho, bakhululwe ngumthethwandaba kamantshi eHarare ngoLwesibili.
Abantu laba ababotshwe besemawofisini awebandla leMDC-T ekhokhelwa ngoMnu. Nelson Betheswa amacala okwephula iziqondiso zomthetho weCriminal Law (Codification and Reform) Act kulandela ukutshengisela kwabo eHarare bekhonona ngokhetho olusanda kwenziwa.
Igqwetha labo, uMnu Gift Mutisi, uthi bajabule ngenyathelo elithethwe ngumantshi.
“Isahlulelo besisihle ngemva kokubalisa izehlakalo zalokho okwenzakalayo. Behlulekile njalo ukubalisa ukuthi omunye ngomunye walaba batshengiseli waphambanisa ngaphi lokuthi kungani bengamelanga bajeziswe enkantolo.”
Uqhubeke esithi abatshutshisi behlulekile ukuveza ubufakazi obucacileyo obutshengisa ukuthi lababantu bangaba yingozi emphakathini.
Omunye walaba bantu abakade bevalelwe ongathanda ukuthi simveze igama wamukele ngenjabulo isinqumo esithethwe ngumantshi.
“Ngiyathaba kakhulu ngesinqumo esithethwe ngumantshi ngoba lokhu vele kakulani labathi sakwenza. Thina sasitshengisela nje ngoba ukuthulisela kweZEC (Zimbabwe Electoral Commission) kwasekusicabangisa ukuthi bafuna ukuqilibezela umongameli uChamisa.”
Omunye njalo ongathandanga ukuvezwa igama usole kakhulu ukusetshenziswa kocuku ngabezomvikela kulesi sehlakalo.
“Eqinisweni lonke mfowethu, thina siyizimvu nje esezinikelwa nje ngoba bakhona abazama ukuzigeza ecaleni abalenzayo. Ukutshengisela kwethu kwakungelani lokudubula abantu abangelacala njalo abangelazikhali okwayenzwa ngamasotsha. Sikhangelele ukuthi idale lomthethwandaba lizabayangisa futhi laba abasibophisayo ngoba eqinisweni kabalakho okubambekayo okungenza sibotshwe”.
Igqwetha labantu laba lithi bakhangelele ukukhululwa ngokugcweleyo ngoba vele bengela cala abalidalayo njalo abatshutshisi bengelabo ubufakazi obukhomba lokho.
Kusenjalo, inhlanganiso ebona ngokulondolozwa kwamalungelo abantu eye Zimbabwe Rights Association isikhuthaze uhulumende ukuthi atshiyane lokuhlukuluza abantu abatshengiselayo lokubabopha ngoba lokhu kulilungelo labo ukuthi bekwenze njalo kusemthethweni.
Abantu abahlala emalokitshini awe Harare babikwa sebephilela evalweni ngokuhlukunyezwa ngamasotsha kusukela kuze kubelodlakela ngeviki ephelileyo.
