Ikhomishini yeNational Peace and Reconciliation Commission (NPRC) iqale ngeSonto ukugebha amathambo abantu ababulawa yiGukurahundi incedisana lenhlanganiso yeKuthula Trust, izihlobo labangane.
Kugejwe amathambo kamuyi uNkosikazi Tembi Ngwenya Tshuma lomkakhe uJustin Tshuma eGwayi endaweni eyaziwa ngokuthi yiCross Level esiqintini sako Sipepa esabelweni seMatabeleland North.
Ababili laba badutshulwa bezama ukuya koBulawayo. Lokhu ngokokuqala ukuthi kugejwe amathambo abantu ababulawa yiGukurahundi kusukela ngomnyaka ka1983 kusiyafika umnyaka ka1987 eMatabeleland leNkabazwe.
UMnu. Enock Ngwenya, umnewabo kamuyi uNkosikazi Thembi Ngwenya Tshuma, uthi uyakuthakazelela ukugejwa kwamathambo kadadewabo lowayengumkhwenyana wakhe.
Omunye obesendaweni le nguMnu. Amon Joseph Tshuma, umnewebo kamuyi uJustin Tshuma owadutshulwa lomkakhe uNkosikazi Tendy Ngwenya Tshuma, othi ababili laba babulawa bengonanga lutho.
Abenhlanganiso yeKuthula Trust baphi bazama ukunceda ukugebha amathambo abantu ababulawa yiGukurahundi ngendlela eqondileyo.
UMfundisi Rabson Zikhali, obone kugejwa amabhambo abantu laba, uthi zikhathazeke okumangalisayo izihlobo zababili laba.
Kukhangelelwe ukuthi kuzagejwa amathambo abantu abanengi ababulawa yiGukurahundi okwakuthiwa yayidinga amalwecatshwa ayecatshangelwa ukuthi asekela umuyi uJoshua Mqabuko Nkomo owayekhokhela ibandla leZapu. UNkomo, owakuphika lokhu wacina ebumba uhulumende womanyano lowayengumongameli uMnu. Robert Mugabe ongazange axolise ngombhuqazwe lo.
UMongameli Emmerson Mnangagwa uthi abantu sebekhululekile ukukhuluma ngombhuqazwe lo njalo lokugebha amathambo ezihlobo ezabulawa yiGukurahundi.
UMnu. Joseph Tshuma webandla leZanu PF uthi lokhu kuyakwenza ukuthi abantu ababulawelwa izihlobo zabo batshotshwe inhliziyo.
