Ugcotshwe lamuhla umongameli omutsha kweleBotswana, uMnunzana Duma Boko, kumkhosi obulenkokheli edabuka emazweni atshiyeneyo, egoqela uMongameli Emmerson Mnangagwa.
Abamabandla aphikisayo emhlubulweni wezansi yezwekazi leAfrica akade besemkhosini lo bathi okwenzakale kweleBotswana kuletha ithemba lokuthi inguquko iyeza emazweni afana leZimbabwe.
UBoko owalahla phansi ibandla leBotswana Democratic Party (iBDP) elikhokhelwa ngobengumongameli uMnu. Mokgweetsi Masisi, ugcotshwe namuhla libalele kweleBotswana.
Engakenzi isifungo lesi, uBoko uthe eleBotswana litshengise umhlaba wonke jikelele ukuba ilizwe leli libuswa nguzulu.
Ukunqoba kwebandla lika Boko eleUmbrella for Democratic Change (iUDC), sekulethe ithemba kwamanye amabandla aphikisayo ezansi yezwekazi leAfrica athi umbuso wamabandla aletha uzibuse usubanga emaphethelweni.
Okhokhela ibandla leBuild One South Africa (iBOSA) uMnunzana Mmusi Maimane uthi iyeza inguquko emhlubulweni lo, okugoqela eZimbabwe.
“Sesiqalile ukubona inguquko, eZambia sayibona, iZimbabwe iyalandela kanye leSouth Africa. Asiqhubekeni ngomfutha lo.”
Owayengumkhokheli webandla leCitizens Coalition for Change uMnu. Nelson Chamisa, laye obesemkhosini lo, uthi okwenzakele kweleBotswana kutshengisa ukuthi isikhathi sontshintsho sesifikile.
“Lilanga elihle leli, uyabona ukuthi umbuso wabantu ngabantu usufikile emhlubulweni wethu. Lokhu kuyasijabulisa kakhulu.”
UChamisa uthi ukunqoba kwebandla leUDC kweleBotswana kulemfundiso enkulu ebantwini beZimbabwe.
“Lokhu kusitshengisa ukuqakatheka kokhetho olukhululekileyo. Uyabona ukuthi ungaba lokhetho olungakhulelekanga kuyenzakalani. Khangela iMozambique.”
UMnunzana Job Sikhala, oke wavalelwa phose okweminyaka emibili eRemand Prison nguhulumende kaMnangagwa, uthi okwenzakale eBotswana kutshengisa ukuthi umbuso wabantu ngabantu uyaqhela umhlubulweni wezansi yezwekazi leAfrica.
"Lokhu okwenzeka eBotswana kusitshengisa ukuthi umbuso wabantu ngabantu usugxila kumagumbi wonke kuzwekazi lethu. Siyayibongela iBotswana.”
UMongameli Hakainde Hichilema wakweleZambia laye uyakuthakazelela okwenziwe nguBoko.
"Ngiyajabula ukuba lapha, langesinqumo esithethwe ngabantu beBotswana."
Abakubandla leZanu PF bathi kumele okwamanje abantu eZimbabwe bananzelele ukuba kubusa ibandla labo njalo lilakho ukuqhubeka lizibambe esidukwini uma lingakhethwa njalo nguzulu ngomnyaka ka2028.
Obona ngokwethulwa kwemibiko kubandla leZanu PF, uMnu. Farai Mharapira, uthi okwenzakale eBotswana ngokwabantu bakulelolizwe njalo bayakuhlonipha lokho.
"Siyahlonipha okwenzakale eBotswana, sifisa ukuthi amabandla aphikisayo kweleZimbabwe layo athathe ezifundo ekwazi ukuthi intando yabantu ayitsho ukuthi kunqobe bona kuphela."
Ezinye iziphathamandla ebezisemkhosini lo nguMongameli Nangolo Mbumba weNamibia, umsekeli kamongameli weSouth Africa, uMnu. Paul Mashatile, umkhokheli kahulumende we-Eswatini uMnu. Russell Dlamini labanye.
Forum