Amapholisa adubule abantu eHarare ngoLwesine ntambama kwafa oyedwa kwathi abanye balimala olumangalisayo.
Abazi ngokwenzakalayo bathi abantu laba badutshulwe ngesikhathi abatshayeli bemitshova besala ukusuka endaweni lapho abehlisela khona abantu kulandela isinqumo esethulwe yikhansili yedolobho leHarare esokuthi kumele bengasafiki enzikini yeHarare Central Business District.
Bathi amapholisa abebambisane lebutho leZimbabwe National Army ngesikhathi kususwa imitshova labantu abathengisa impahla phakathi kwedolobho leli.
Kulabantu ababikwa ukuthi bagongode amapholisa lamasotsha ngamatshe bezama ukuvimba ukuthi bengasuswa endaweni ezitshiyeneyo. Amapholisa acine edubula abantu abambalwa kwabhubha oyedwa abanye balimala.
Lokhu kwenze kwabalomsindo omangalisayo kulabantu abazame ukutshisa inkamba yamapholisa lezimota zamapholisa. Kasenelisanga ukukhuluma lesikhulumeli samapholisa uSenior Assistant Commissioner Charity Charamba.
UNkosazana Sithokozile Mhlophe utshele iStudio 7 ukuthi bekuthunqa intuthu eyesabekayo eHarare izolo ntambama amapholisa esilwa labantu makhaza.
UMnu. Thabang Nare, ingcwethi yezombusazwe ezimele yodwa, uthi akumelanga kukhahlanyezwa abatshayeli bemitshova labantu abathenga bethengisa impahla emigwaqweni.
