Izakhamizi lezisebenzi zikaLoliwe eseNational Railways of Zimbabwe, sezikhuthaze uhulumende ukuthi aqakathekise impilo yezisebenzi lozulu osebenzisa impahla yenkampani le, ayivale nxa kusehlula, kulandela ukufa kwabantu ababili emahofisini alinkampani koBulawayo ngenxa yemitshina engasebenzi kuhle.
Abantu laba ababili bawelwe ngumtshina othwala abantu i-Elevator eyayibikwe ingasebenzi ngendlela ngoLwesihlanu. Omunye wababhubhileyo yisisebenzi lesi esasisiya khangela umtshina lo ukuthi ulungiswe kwathi omunye owesifazana yisisebenzi sikaLoliwe.
Kulandela isehlakalo lesi, inkampani le ye National Railways of Zimbabwe, isimise ukusetshenziswa kwama elevators wonke osekutshiye izisebenzi kanye lalabo abenza ibhizimisi kusakhiwo lesi bekhwela ngenyawo besiyabamba i 28th floor. Isakhiwo lesi yiso eside ukwedlula zonke koBulawayo.
Osebenza koLoliwe, uNkosikazi Emma Maseko, uthi uzulu uphatheka kuphela lapho kuthe kwafa abantu kodwa izisebenzi zalinkampani zilimala phose nsuku zonke ngenxa yemitshina esetshenziswayo yakudaladala kanye lenjanji yakhona esiyingozi lapho izitimela zihamba. Uthi lanxa amaphephandaba ebhala indaba lapho kuthe kwaphambuka isitimela esithwala abantu bona njengezisebenzi bahlezi besengozini ngoba izitimela ezithwala impahla zihlezi ziphambukile kunjanji bona bephakathi kwazo.
Inengi labo, uthi lihlalele khona ukuthi lizatshiya liyengaphi njengoba kungela msebenzi elizweni, selihlalele ethembeni lona elivele lingabulali ukuthi mhlawumbe kwelinye ilanga uhulumende uzalungisa inkampani le lenhlanganiso ezikhangele impilakahle yezisebenzi zingenele.
Isakhamuzi, uMnumzana Lancelot Makhalima, uthi kayivalwe linkampani uhulumende aze athole imali yokuyivuselela. Uthi kuphathisani ukuthi ukulimala kwabantu kubeyinsakavukela umchilo wesidwaba kodwa kungela lanzuzo eza kulinkampani.
Khathesi, uthi abantu sebezesaba lokungena kuzakhiwo zalinkampani ngoba kusobala ukuthi vele akula lutho olusasebenza ngendlela kungakho kayivalwe lezitimela zihlaliswe phansi.
Esikhathini esinengi lapho izisebenzi zenkampani le zikhonona ziyabe zikhuluma ngemali yeholo esileminyaka ingabuyi ngesikhathi.
UNkosikazi Rita Ndlovu, okhangela amalungelo ezisebenzi, uthi abaqhatshiweyo kumele bakhonone ngendlela abasebenza ngayo ikakhulu nxa iyingozi ebangelwa yimitshina esigugile kumbe ukusilela kwempahla yokuzivikela. Ye, iholo liqakathekile kodwa okumqoka uthi yimpilo yomuntu ngoba kulezi insuku ungaze ufele emsebenzini alukho uncedo imuli yakho eyasala iluthola.
Ama elevators emahofisini la abikwa ebevele eseleminyaka engasebenzi ngendlela phambilini kokuthi izisebenzi lezi ezimbili zehlelwe yilingozi. Nyakenye linkampani ike yamisa ukuhamba kwezitimela ezithwala abantu kulandela ingozi yokuphambuka kunjanji esitimeleni esivela eHarare sisiza koBulawayo. Ngesikhathi lesi, umgcinisihlalo kaLoliwe uMnumzana Alvord Mabhena, watshela intatheli ukuthi yena ubona kungcono ukuthi uhulumende ake amise ukuhamba kwezitimela ikakhulu ezithwala abantu inkampani le isadinga imali yokuqhuba umsebenzi ngendlela.