Izimbamgodi iFC Platinum le Ngezi Platinum Stars yiwo amaqembu omdlalo wenguqu azadibana kufinal yalonyaka eyenkezo yeChibuku Super Cup.
Ekhuluma ngemva kokunqoba kweqembu lakhe elitshaye ele Dynamos nge 1 ka nya ngeSonto, umqeqetshi weqembu le FC Platinum uNorman Mapeza uthe kuqakathekile ukuba belungiselele ngemfanelo ukuze bephakamise inkezo ye Chibuku.
“Ngiyajabula ngendlela abafana abasebenze ngayo. Umsebenzi onzima sesiwenzile njalo osekusele yikuba sihambe siyedlala sikholise ukuba ku final. Kumele silungiselele kuhle njalo ngilethemba elokuba kusazoba mnandi,” kutsho uMapeza.
Ngokwesithathu ukuba iqembu le FC Platinum lifinyelele ukuyadlala ku final yenkezo ye Chibuku Super Cup njalo liyiphakamise ngomnyaka ka 2014 lapho elinqobe khona ele Harare City nge 3 ka 1 ngemva kokutshaywa kwembekwa.
Lifinyelele ku final langomnyaka ka 2016 lapho elinqotshwe khona nge 3 ka 1 liqembu le Ngezi Platinum Stars lona elinqobe ele Cranborne Bullets nge 1 ka nya ngoMgqibelo okutsho ukuba lalonyaka lawa maqembu azadibana njalo ku final.
Umdlali weqembu le FC Platinum uRainsome Pavari uthi kabatshaywa luvalo ngoba bezadibana leqembu elake labanqoba kumncintiswano ofanayo eminyakeni edluleyo.
“Ngithabe kakhulu ngokufika esikwenze ku final. Asesabi lutho thina lathi sizimisele njalo sizabona ukuthi sizakwenzenjani ngabo. Libhola leli njalo sizadlala lathi esikwenelisayo,” kutsho uPavari.
Abaqoqi bomncintiswano we Chibuku Super Cup khona bezakutsho ukuba ifinal yalonyaka izadlalwa ngaluphi usuku kanye lokuthi izadlalelwa kuyiphi inkundla.
Imidlalo yesigaba se quarter – final idlalelwe enkundleni ye Baobab kuthi eye semi – final yona idlalelwe enkundleni ye National Sport yona ekhombise ukuba kayilungelanga ukudlalela nxa izulu lisina njengoba umdlalo wangoMgqibelo ufike emaphethelweni abadlali sebebhukutsha emanzini.