Amapholisa asebenzelana le Anti-Corruption Commission asebophe elinye njalo ilunga ledale lephalamende elicatshangelwa ukuthi lehluleka ukusebenzisa kahle imali yokuthuthukisa izabelo eye Constituency Development Fund.
Umnu. Franco Ndambakuwa omele iMagunje edale lephalamende ekubandla le Zanu PF ubotshwe ngoMvulo wavalelwa esitokisini senkambeni yamapholisa ese Rhodesville e-Harare.
UMnu. Sternford Chirindo ongumgcinisihlalo we Anti-Corruption Corruption uthe angeke akhuluma ngodaba lokubotshwa kuka Ndambakuwa ngenxa yokuthi amanye amalunga edale leli adingwayo angacina ecatsha nxa engezwa ngokwehlele omunye wabo.
UNdambakuwa ocatshangelwa ukuthi wehluleke ukutshengisa uhulumende ukuthi usebenzise njani inkulungwane ezingamatshumi amahlanu amadollar eMelika-$50,000 ayinikwa phansi kohlelo lokuthuthukisa izabelo olwe Constituency Develpment Fund-CDF, ukhangelwe ukumiswa phambi komthethwandaba ngoLwesithathu.
Omunye wakhe uMnu. Marvelous Khumalo omele iSt. Mary’s edale lephalamende ubotshwe ngeviki ephelileyo wakhululwa esebhadele imali yesibambiso emthethwandaba.
Amalunga la kwakumele ukuthi asebenzise imali le ekuthuthikiseni inhlalakahle kazulu.
UMnu. Albert Mhlanga omele umuzi wePumula koBulawayo, edale lephalamende uthe akulamthetho osobala wokubophisa amalunga edale lephalamende nxa engasebenzisanga ngemfanelo imali yezabelo.
UMnu. Matshobana Ncube igqwetha eliyingcwethi kwezamalungelo oluntu uthi umthetho okade kumele usetshenziswe ukubophisa amalunga edale lephalamende yi Public Finance Act ongabunjwanga kahle lidale leli.
