Amapholisa asebophe inkokheli yebandla leMovement for Democratic Change Alliance ebizama ukungena eMorgan Richard Tsvangirai House eHarare ngoLwesihlanu kulandela ukuthathwa kwamahofisi la libandla leMovement for Democratic Change elikhokhelwa nguNkosazana Thokozani Khupe.
Ababotshiweyo abasekela iMDC Alliance ekhokhelwa nguMnu. Nelson Chamisa bagoqela uMnu. Tendai Biti, uNkosikazi Lynett Karenyi, labasakhulayo abambalwa.
UNkosazana Fadzai Mahere, isikhulumeli sebandla leli, uthe kuyamangalisa ukubotshwa kwenkokheli yeMDC Alliance ngoba kade befuna ukungena ewofisini yabo.
UMahere uthe kubi kakhulu okwenziwe libandla leMDC-T ebelibambisane lebutho lamapholisa ngesikhathi lingena emawofisini le ebusuku.
Uthe ibandla leli selibambisana lele Zanu PF ukwenzela ukubhidliza iMDC Alliance eqhubekela phambili isithi uChamisa wangoba uMongameli Emmerson Mnangagwa ngomnyaka ka2018 lobanje umthethwandaba wathi uMnangagwa nguye owanqobayo.
Ibandla leMDC-T lithi lilandela okwethulwa yiSupreme Court eyethi uChamisa kathengwanga ngemfanelo kulandela ukubhubha kuka Tsvangirai ngomnyaka ka2018 ngakho-ke kumele kwenziwe umhlangano wokukhetha inkokheli entsha.
Isikhulumeli seMDC-T, uMnu. Douglas Mwonzora, uthi ngamanga ukuba bathethe amawofisi la bengidiswa libutho lamapholisa.
“Angibadingi abakubutho mina ukuthi ngiyefika eHarvest House, angiwadingi lamapholisa ukuthi ngiye eHarvest House, engikudingayo ngumlomo wami leziqondiso ongisekelayo. Ngapha iziqondiso ukuthi kumele inikezwe kubanini bayo lindawo ngendlela engela kulwisana, yikho kanye okwenzakeleyo. Ngiyisiphathamandla esihloniphekayo mina njalo ngiyinkokheli uqobo kungakho aluzange lwaba khona udlakela, akekho otshayiweyo. Akekho okhononayo ukuba walinyazwa kumbe ukwenziwa enye into embi. Le yiyo kanye indlela okumele kwenziwe ngayo izinto kwezombusazwe kulezi nsuku, kasilwi.”
Isikhulumeli sikaMnu. Nelson Chamisa umkhokheli weMDC Alliance, uDokotela Nkululeko Sibanda, uthi kunenga inhliziyo okwenziwa libandla leMDC-T eselidlelana leZanu PF.
“Izolo ntambama phakathi kobusuku sibone amasotsha awohlangothi lwe Zimbabwe National Army besiya ku-headquarters eye MDC Alliance besebenza ngendlela efana laleyo abayenzayo bethatha iZBC lezinye izindawo ngo2017 bezakwenza icoup yabo leyana. Abakwenzileyo yikuthi bafike balwisana labakade belama guards awe security kuMDC Alliance basebengena phakathi bathatha ibuilding.”
Bethukile abanye abantu ngokwenziwe lobandla leMDC-T.
Omunye wabo nguMnu. Bigboy Sibanda, isakhamuzi seSouthlea Park eHarare, okhala kakhulu ngokwephulwa kwesisekelo sebandla leli ngesikhathi kubhubha uTsvangirai.
“Ngabe iConstitution yayilandelwe okwenzakalayo khathesi ngabe akukho. Bona behlulwa yikulandela iConstitution so yikho sesibona oKhupe sekuyibo asebethethe iHarvest House ngoba ekuqaleni vele oChamisa labanye babevele bengayilandelanga iConstitution yabo eyeMDC. ”
